Earthquake drills sa tunghaan giawhag nga seryusohon
Giawhag sa pangulo sa Mandaue City Disaster Risk Reduction and Management Office (CDRRMO) Felix Suico ang mga pribadong tunghaan ug institusyon nga seryusohon ang paghimo sa earthquake drill aron malikayan ang pagpanic sa mga tawo.
Sumala pa ni Suico nga kini maoy nahitabo sa usa ka pribadong tunghaan sa may Brgy. Looc niadtong Huwebes sa hapon sa dihang nasinati ang kusog ang instensity 5 nga linog sa Sugbo.
Sumala pa ni Suico nga moabot ngadto sa 16 ka mga tinun-an ang gitabang sa maong tunghaan human giingong nag-hyperventilate kini ug ang 8 niini ang gibalhin sa tambalanan human giingong nakuyapan.
Si Suico niingon nga daw way kasinatian sa earthquake drill ang mga tinun-an ug way tinong evacuation plan ang tunghaan. Wa hinuoy naguba nga edipisyo sa Mandaue atol sa linog.
“Naay mga estudyante nga na-rattle ni-result ngadto sa nag-hyperventilate hinuon sila,” matod ni Suico.
Kini maoy hinungdan nga gipasuspenso nila ang klase sa maong tunghaan niadtong Huwebes sa hapon human sa maong linog. Nisunod sab ang ubang mga tunghaan sa dakbayan sa suspension sa klase.
“Ang ako ana maong naghyperventilate sila kay wa pa man gud sila nagka-experience ug drills, lack of experience. Mostly sa apektado kaayo kay sa UC-LM, naay 16 ka buok nag hyperventilate ug ang walo ana mao toy atong seryoso gi-transport sa ospital,” dugang ni Suico.
Pakyas ang Superbalita Cebu sa pagkuha ug habig sa maong institusyon sa dihang gisuwayan ug tawag ang tagdumala niini.
Nasuta ning mantalaan nga ang UC-LM maoy pinaka-taas ug populasyon nga tunghaan sa Mandaue nga hapit moabot ngadto sa 18,000 ka tinun-an ni Suico.
Paambit ni Suico nga nagkinahanglan gyud ug enhancement of drill ang mga pribadong institusyon ilabi na ang mga pribadong tunghaan.
Nabantayan usab niya nga “i-take for granted” lang sa mga tinun-an ang mga drill sama sa linog maong kon makasinati kini ug matuod nga linog, kusog mag-panic.
“Sila maoy kinadaghanan ug population niya pagkahitabo gahapon, murag hulmigas gibungkag, wa sila makaadto sa ilang evacuation area, ang uban wa kahibaw aning ilang evacuation area. Gilupig lang sila sa mga public elementary schools nato, twice a year o hangtod sa tulo sa usa ka tuig maong lahi ra gyud, naa na gyud silay presense of mind kung naay emergencies.