Trapik sa unang Mactan bridge nagkamang human sa linog
Trapik sa karaan tulay sa Mandaue–Mactan nagkamang human nasinati ang linog niadtong Huwebes sa hapon sa dihang mga tinun-an sa University of Cebu Lapu Lapu–Mandaue nagkaguliyang sa paglabang sa kalsada.
Naproblema ang City Traffic and Management System (CTMS) sa Lapu-Lapu City sa pagdumala sa trapiko sa dihang inanay ang pag-irog sa mga sakyanan nga mopa-ingon sa Mandaue City.
“Mga 4:30 (hapon) ni buildup gyud ang traffic,” tipik sa pamahayag ni Jay Pino duty
desk officer sa CTMS sa dihang nahinabi sa Superbalita Cebu.
Dihang gikontak ang sakop sa Traffic Enforcement Agency of Mandaue sa CTMS nasayran nga bul-og sa mga tinun-an ang nagdungan og pagpanggawas sa maong tunghaan nga maoy nakabara sa trapiko.
Dugang pa ni Pino nga milugak ang dagan sa mga 6:00 sa sayong gabii ug nabalik sa normal ang dagan sa trapiko.
Samtang ang Mactan Electric Company nipatuman niadtong Huwebes sa gabii og rotational brownout sa ubang bahin sa Lapu-Lapu ug lungsod sa Cordova resulta sab sa maong katalagman kini gumikan sa kakuwang sa power supply sa National Grid Corporation of the Philippines.
Sa laing bahin, ang Cebu Pacific mipahibawo sa pagkanselar silang biyahe Cebu to Ormoc sugod kagahapong adlawa ngadto na sa Hulyo 9 gumikan sa gikatahong daut nga naangkon sa tugpahanan sa Ormoc human sa linog.
Base sa Facebook post sa maong airline company gipahibawo ang ilang mga apektadong pasahero nga mamahimong maka-rebook sa ilang flight nga way multa sulod sa 30 ka adlaw gikan sa ilang original departure date.
Mamahimo sab nga magpa-refund o ang pag-avail sa travel fund nga magamit sa umaabot nila nga biyahe nga way bayran.