Hulga sa drugas

Ang sunodsunod nga pagkasikop sa mga barangay ug municipal officials nga nalambigit sa drugas ug illegal nga mga kalihukan, nagkompirmar nga bisan sa hugtanay nga kampanya sa administrasyong Duterte, nagpabilin ang dakong suliran. Mao tingali nga human makita ni Presidente Rodrigo Duterte ang kalawom na sa problema sa drugas sa nasod, miundang na siya sa iyang saad nga iya kining sulbaron sa unom ka buwan apan nangayo og laing unom ka buwan.

Bisan gani kon gipig-utan og maayo ang National Bilibid Prisons (NBP) nga maoy tinubdan sa 80 porsiyento sa supply sa drugas sa nasod, nagbaha gihapon ang shabu, apil na dinhi sa Sugbo.

Daghang mga ronda diin ang tinubdan natino nga gikan gihapon sa NBP. Bisan ang kapulisan naglibog kon ngano.

Bisan sa binilyon na nga kantidad sa drugas ang nasakmit, nagpabilin ang dakong suliran sa illegal drugs kay human masikop ang dagkong mga drug dealer, dunay mga tawo nga ningpuli. Mao ni ang hinungdan nga ningtumaw ang bag-ong mga ngan.

Lisod puohon ang drugas kon ang gamot niini niabot na ngadto mismo sa kagamhanan, labina sa barangay diin anha unta magsugod ang kombate sa illegal drugs.

Ang pagkasikop usab sa mga elected official nagpakita sa laksot nga reyalidad, nga mahimo na nga ang usa ka tawo nga nalambigit sa ilegal mapili pinaagi sa kuwarta.

Kon ingon niani ang sitwasyon karon, unsa na kaha kon wa pa masikop kining mao nga mga opisyal?

Hayan pipila ka mga tuig gikan karon, kon kini sila gipasagdan ug wa masikop, di na maayo pa ang sakit ning nasura, mahisama na kini sa usa ka cancer.

Ang nasod mahisama sa usa ka bukog nga gitangagtangag sa iro.