Ka duha utong, dubling kalipay

Adlaw nga natawhan karon sa akong mga kaluha maong ang akong lindog mahitungod sa dubling kalipay sa mga ginikanan nga dunay anak nga kapid.

Kasagarang ginikanan mahadlok manganak og kaluha kay gawas nga mokalit pagdaghan ang anak, ma dubli sab ang tanang gastuhan.

Apan sa mga ginikanan nga sama nako, kini tanan di igbali kay doble man sab ang kalipay nga among nadawat. Daghang nangutana kon unsay lamang kon dunay anak nga kapid.

Basi sa akong kasinatian, sa usa lang ka sabakan, duha dayon ka bata ang mahimugso. Dili mahulagway ang kalipay sa usa ka inahan inig ka dungog sa pirmirong hilak ug kakita sa mga dagway sa bata labi na kung parehas kini og hitsura kun identical twins.

Dili sab ikabaylo ang kahinuot sa usa ka inahan kon magpa-suso og dungan ug magsudong sa mga inosenting angel nga nahinanok sa iyang isig ka kiliran.

Ang kanindot sab kon kaluha kay dungan kini sila og tubo ug kasagaran susama og panginahanglanon. Kon palita’g sinena, terno dayon kini labi na kon mag sale o buy one-take one.

Dungan sab kini sila og tubo maong automatic na ni silang mahimong best friends sa usa’g-usa ug kanunay maglambuyog og kuyog halos sa tanan nilang mga kalihukan hangtod ma bayong-bayong. Duna dayon silay permanenting pares nga ilang masampit sa kalipay og kasakit.

Dili na sab ni nimo sila kinahanglang tudluan pa sa pagbahig o bahin kay naanad naman kini sila nga magtunga sa tanan gikan sa pagkaon, duwaan, butang ug mga gamit. Gani akong namatikdan nga magluya ang usa ini nila kung buwagon o lagyuon.

Bisag parehas ni sila halos sa tanan, lainlain kini sila og batasan. Dunay hilumon, duna say sabaan. Kon dunay mauwawon, duna say sipa ug baga.Dako akong pagdayeg sa mga ginikanan og kaluha kay nahibaw ug nakasabot man ko nga bisag doble ilang mga sakripisyo, kahago ug gasto, dubli man sab ang mga katawa, kalipay ug way puas nga gugma nga ilang madawat.

Kaninyo kuya Boiko ug Jecko, Happy 22nd!