Kinsa si Isnilon Hapilon?
Natawo sa 1966 nga usa ka Arabic-speaking preacher nga nagbasi sa Basilan. Nakatapos og engineering
degree sa UP. Natudlong komander sa MNLF nga maoy nag-unang pundok sa mga rebelde sa Mindanao nga gitukod ni Nur Misuari. Nahimong ikaduhang dako-dako sa Abu Sayyaf nga gitukod sa magsoong Abdurajick ug Khadaffy Janjalani nga hanas sa pangidnap, pagpamunggot og ulo, pamomba ug ilegal nga negosyo sa drugas. Notado sa dihang ilang gikidnap ang 20 ka mga tawo lakip sa tulo ka mga Amerikano sa Filipino Resort sa 2001 diin usa sa maong langyaw gipunggotan sa ulo kay wala makahatag og ransom. Sa 2002 ang US Dept. of Justice milambigit ni Hapilon sa pangataki mitanyag og 5M
dollars nga patong sa ulo sa makahatag og inpormasyon aron masikop. Sa 2008 ang tropa sa gobyerno mibombardiyo sa kampo sa Abu Sayyaf duol sa Jolo Island nasamdan si Hapilon sa kamot. Samdan usab sa laing
military operation sa 2013. Sa 2014 si Hapilon nadiparahan sa usa ka video nga sa iyang kiliran adunay duha ka nagmaskara nga nanumpa sa ISIS nga gituhoang magsoong Omarkhayam ug Abdullah Maute. Hangtod nga naila si Hapilon nga most wanted extremist top militant kay maoy gitudlo nga lider sa ISIS sa Southeast Asia sa 2016. Nag-organisar og kaalyansa dinhi sa nasod ang Dawlatul Islam Wilayatul Mashriq nga gisakopan sa dili mominos 10 ka mga rebelding grupo nga maoy iyang gisaligan sa pagtukod ang magsoong Maute nga gikan sa pagkabuotan nahimong radikal human makaestudyo sa laing kanasoran. Nanotado ang magsoong Maute sa dihang ilang gilunggoan sa ulo ang ilang gikidnap nga si Salvador Hanubas ug igsoon. Sa Enero 2017 gikaengkwentro sa tropa sa gobyerno ang maong militanting grupo diin 15 ang napatay ug si Hapilon nahiagom og dakong samad sa bukton, diriyot mahubsi sa dugo ug mitago sa bukirang rehiyon sa Butig, Lanao del Sur. Si Amerila Umbra Kato nga maoy nagtukod sa BIFF gikang mibiya sa MNLF ug MILF nga suod nga amigo sa magsuong Maute miduaw ni Hapilon sa gitagoang lasang. Gitabangan nga makatago sa Marawi City nga balwarte sa Maute Group. Sa dihang gironda sa mga otoridad aron sikopon si Hapilon gipanalipdan sa mga sakop sa Maute nga giabagan sa Abu Sayyaf, BIFF ug pipila ka mga foreign
fighters sa Chechnya, Indonesia ug Malaysia nga maoy pabilo sa gubat sa Marawi. Lakip sa napatay ang Malaysian nga pinanser sa Maute nga si Mahmud bin Ahmad ug Omarkhayam Maute, buhi si Abdullah Maute ug laing igsoon Madie Maute. Nadakpan ang mga ginikanan Cayamora Maute ug Farhana Romato Maute, mga ig-agaw Mohammad Noaim Maute alyas Abu Jadid, Farida Pangompig Romato ug uyab Abdulrahman Dimakuta Sibad.