Nahinumdom sa tuig 2013
Mas alerto ang mga Sugboanon sa linog nga nasinati gahapon sa hapon. Pero daghan pa gihapon ang ang naapiki kay wa masunod ang angay buhaton sa panahon nga dunay linog.
Ang tay-og sa yuta gahapon nakapahinumdum nako sa linog niadtong 2013. Kauban sa akong cameraman nga si Robert Abanes nag- cover mi sa seremonyas sa pagtapos sa Ramadan didto sa mosque sa Mambaling, Cebu City. Samtang nagpaabot mi nga mahuman ang pag-ampo diha ko’ y gikaestorya sa likod sa mosque. Gitaliwad-an ni sa firewall nga subra sa 20 ka tiil ang gihabugon nga iya sa duha ka dagkong tindahan. Pagtay-og sa yuta niapil sab og sayaw ang duha ka firewall. Salamat nga wa matumpag o matumba padung sa akong nahimutangan. Kay kon naparehas pa sa Pasil Fish Market o sa usa ka dakong tindahan sa construction materials sa dalan Natalio Bacalso nga maayong pagkalusno ang dakong bahin, siguradong adto han-ok nako ug sa Muslim nga akong gikaestorya ang duha ka firewall. Salamat sa Ginoo nga wa niya itugot nga maapil mi sa listahan sa mga naapiki sa maong katalagman.
Basi sa maong kasinatian daghan ko og nakat-onan. Kay di man lage magsaba ang linog mas maayo nga kon malikayan likayan nga mag-estorya o mag-estanbay sa kilid o tungod sa firewall, habog nga sementadong koral, duol sa gabok nga poste nga may gikutay nga linya sa koryente. Bisan sa tugkaran sa mga balay nga sa imong pagtoo dali ra matumpag.
Kon naa ka sa sud sa balay kanunayng magmabinantayon asa mopasok o magpasalipod. Kinahanglan nga suhetohon daan asa ang pinaka lig-on nga bahin . Apil na sa opisina o pabrika. Sa mga eskwelahan palig-unon ang mga earthquake ug fire drill. Ako ni nga sugyot kaniadto apan wa pa gyud mapatuman hangtod karon. Ang pag-andam og mga hard hat diha sa mga classroom. Ang gitambag mao ra man ang pag gamit og libro nga itabon sa ulo. Mas maayo ang hard hat kay human masul-ob ug malock libre na ang kamot sa mga tinun-an pagpanghawid asa sila padung. Sa linog niadtong Huwebes wa gyud ko makamatikod kay naglawig man mi sa kadagatan sa Bohol ug Opon uban sa mga divers nga nangita sa patayng lawas ni Mayor Gisela Boniel sa Bien Unido. Unya layo ra sab sa peligro kon may tsunami nga mahitabo kay gialirongan man mi sa daghang isla.
Hisgut ta og Bien Unido nahimamat nako gahapon didto sa pantalan sa Punta Engaño sila si Junnel Hoybia, Susana Mayone, Cristina Gadiano, Jose Aladin Cuizon, Boverlyn Becari ug Emelyn Hoybia. Padung silang mamauli sa ilang yutang natawhan nga magpiyesta karong adlawa. Ang isla sa Malingin, Bien Unido kansang Patron mao si San Pedro. Happy Fiesta kaninyong tanan.