You should know by now

Naghinay-hinay man gud kog lakaw kay maoy akong gihunahuna ang pagbuwag namo ni Ray, nga naguol ko karon kay ako pa diay gihapon ang tinuod niyang love hangtod karon. Ug mao na lay akong namatngonan nga misunod siya nako dihang iya kong gisangpit. Mihunong kog lakaw. Nagdali ko pagpahid sa akong mga luha sa mata.

Pinugos kong mipahiyom kang Ray nga diha na sa akong atubangan.

“Nia ka man lagi? Kining, kuan ba, nganong misunod ka man nako, Ray?” Wa magkadimao ang akong pangutana.

“Di na ko kaantos sa akong gibati, Nicole.”

Nagpakaaron-ingnon kong wa makasabot.. Mikatawa kog kusog.

“Ngano man diay, Ray, gusto kang makigbalik kang Shiela?”

“Di kang Shiela, Nicole, kondi nimo. Let’s give another

chance para sa atong gugma.” Kalit kong miseryuso. Unsaon man gud, puwerte mang seryusoha ni Ray. Ug ako sab, nagtugkad sa akong gibati kang Ray, sa tinuod kong gibati niya karon. Angay ko bang limbongan ang akong kaugalingon sa tinuod kong feeling niya? Di ba mas sakit man kini kon limdan ko ang akong kaugalingon?

“S-Sige, Ray. Hunahunaon ko pa na.” Mihana kog talikod kang Ray apan gikuptan niya ang usa ko kamot. Wa gyud niya buhii. Nakaginhawa kog lawom. Di ko na kapugngan ang akong kaugalingon.

“Ray.” Hapit di madungog ang akong tingog.

“Di ko na maghasol nimo, Nicole, kon karon sultihan ko nimo nga wa ka nay gugma nako.”

Wa na koy gugma? Sus, di na tinuod, uy, Ray. Hilom kong nakaingon.

“Aw, di lang dinhi, Ray. Didto lang sa among ba’ay. I

mean, pamisita nako unya.” “Karon na, Nicole. Di na ko kahuwat unya sa imong tubag.”

Mihana paggakos si Ray nako. Gitukod ko ang akong palad sa iyang dughan.

“Naunsa ka ba, Ray? Daghang tawo, o. Kita ra ang gitan-aw.” Nagpahiyom na ko. Agrisibo na kaayo si Ray. Ug nasuta ko nga nagmatinud-anon siya sa iyang tuyo ron nako.

“Magsinabtanay na ta, Nicole. Kon magselos ka nako, mosabot ko. Kon magselos sab ko nimo, sabta ko. Di na ta mag-away ani.”

Milakaw kog hinay. Milakaw sab si Ray. Nag- holding hands mi. Unya nagpahiyomay mi sa usag usa. Giagbayan ko ni Ray.

( KATAPUSAN)