WBO MIBALIKTAD

Usa ka adlaw human mipabuhagay nga dili na mo- review sa kontrobersiyal nga away ni Manny Pacquiao ug Jeff Horn niadtong Dominggo didto sa Brisbane, Australia, ang World Boxing Organization (WBO) daling mibaliktad sa ilang pamahayag.

Ning higayona, sa ilang pamahayag nga na-post sa ilang Facebook, ang WBO nagkanayon nga mohulma na sila og grupo nga langkuban sa lima ka mga judges nga maoy pino nga molantaw og balik sa away nga walay tingog nga madungog.

Hinuon ang katuyoan niini dili ang pag-usab sa unanimous decision nga naangkon ni Horn kon dili mao lang pagpaabot sa mga boxing fans kon kinsa gyud ang midaog sa maong away nga gisaksihan sa kapin 50,000 ka mga tawo sulod sa Suncorp Stadium.

“Then we will tabulate the results and we will have a clear idea of which rounds each fighter won using an average scale based on 60, 80 and 100%. That means that 3 of the 5 officials have to agree to determine which fighter won the round,” nagkanayon ang WBO sa ilang pamahayag.

“The purpose of this review is to be able to give the fan certainty of who was the winner of the fight, even though we do not have the power to reverse the decision of the judges based on discretion. Other than there was a rematch clause on the fight contract.”

Sa sayo pa, ang WBO una nang mipadayag nga way sayop ang mga decision sa mga judges nga maoy ilang tubag sa sulat reklamo sa Games and Amusement Board (GAB) nga nag-awhag kanila nga mohimog imbestigasyon.

Ang lakang sa GAB gisuportahan ni Pacquiao. Niadtong 2012, ang WBO mi- review usab sa laing kontrobersiyal nga away ni Pacquiao kinsa kontrobersiyal nga napildi usab ni Timothy Bradley sa ilang unang panagsangka diin nasukwahi ang resulta sa review.