MAGSAYO LABNIHAN SA TITULO
Way jetlag kon dili ang kaandam ug ka preparado maoy gibati ni Daniel “El General” Garcia sa Nicaragua taliwala sa iyang nadelatar nga pagabot dinhi sa Sugbo alang sa iyang pagpakig-away ni undefeated ug bag-ong boxing sensation nga si Mark “Magnifico” Magsayo karong gabii.
Mao kini gipabuhagay sa beteranong Garcia sa dihang gikahinabi sa mga tigbalita atol sa official weigh-in kagahapon sa Activity Center sa SM City-Cebu.
Ang Magsayo-Garcia WBO Intercontinental title fight maoy main event karong gabii sa Pinoy Pride 41: New Generation Warriors nga ipahigayon sa IEC Pavillon sa Mabolo, dakbayan sa Sugbo.
“Our flight in Panama was delayed, but we were able to take rest in our hotel. I’m ready for this fight. I know my opponent is a good fighter but I came here to bring the title for
Nicaragua,” matod sa beteranong Garcia pinaagi sa interpreter Ramon Escano.
Si Garcia kinsa niadtong Huwebes sa gabii lang miabot uban sa iyang trainer nga si kanhi world champion Rosendo Alvarez mitakdo sa 126 lbs. sa official weigh-in kagahapon nga mao usab ang gibug-aton ni Magsayo.
Sa dihang gipangutana kon ang pag-knockout ni Magsayo mao bay iyang gitutokan, si Garcia mipasabot nga depende lang sa oportunidad.
“If knockout comes, then I will go for it. But I guarantee you, this is a good fight. I’ll do my best,” dugang ni Garcia kinsa adunay 23-7-2, 15KOs nga record.
Si Magsayo (16-0, 12KOs), sa iyang bahin, nagtuo nga aduna usay ma-knockout ning awaya. Apan sama kang Garcia wa siya motag-an og unsa nga round kay depende ra usab kini sa tayming.
“Aw duna gyud ma knockout ani. Pero di ta katag-an unsa nga round. Ang tayming lang maoy atong huwaton. Pareha sa miagi natong away ba,” ni Magsayo pa sa dihang gikahinabi sa Superbalita.
Dili bag-o ni Garcia ang pagaway sa ubang nasod kay tulo na ka higayon nga nakaaway siya sa Amerika, Mexico, Panama ug ingon man sa Japan diin napildi siya sa world title fight sa inilang Japanese fighter nga si Kokie Kameda.
Ang panag-abot usab ni Jeo “Santino” Santisima ug sa undefeated Tanzanian nga si Goodluck Mrema maoy laing away nga magdugang usab og kaikag sa kagabhion.
Ang duha pulos nakakuha sa ilang timbang – 123 lbs. kang Santisima (13-2, 11KOs) ug 120 lbs. usab kang Mrema (16-0, 8KOs).
Mitakdo usab si Prince Alberta Pagara (27-1, 18KOs) sa 126 lbs. Kinsa makingsinukliay sa iyang mga kumo batok sa Thailander nga si Aekkawee Kaewmanee (16-9, 6KOs).
Mokompleto sa kinatibukcard mao ang supporting bouts tali nila Melvin Jerusalem batok Joey Canoy (10-round) Kevin Jake Cataraja batok Lony Cadayday. /