Mga kontra gipang-knockout
Nagkinahanglan lang og usa ka minuto ug 45 segundos si Mark “Magnifico” Magsayo aron idispatsa ang Nicaraguan challenger nga si Daniel “El General” Diaz sa ilang World Boxing Organization (WBO) International featherweight championship niadtong Sabado sa gabii sa Pinoy Pride 41;New Generation Warriors sa IEC Convention Center sa Mabolo, dakbayan sa Sugbo.
Katulo gyud sulod sa usa ka round napatumba sa wa pay pildi nga Magsayo si Diaz nga maoy nakapapugos ni referee Danrex Tapdasan aron undangon ang away sa 1:45 seconds sa first round.
Sa kadaugan, si Magsayo misaka ngadto sa 17-0 nga baraha, 13 niini iyang gipang-knockout.
Sa una pa lang nga pakahagsa ni Garcia sa kanbas daw sa bangog kining mibarog ug way langan nga giusban ni Magsayo.
Sa co-main event fight, sama kang Magsayo sulod ra usab sa usa ka round nga gipahagba ni Jeo “Santino” Santisima ang kanhi undefeated Tanzanian nga si Goodluck Mrema.
Mipakita si Mrema og kaagresibo sa pagsugod sa away ug wa kini kukahadlong nga miataki ngadto ni Purisima kinsa nagkapuliki usab og panagang sa mga kumo sa Tanzanian fighter.
Apan usa ka makusog nga overhang sa tuong kumo ni Santisima ngadto Mrema kinsa nagsandig sa pisi sa nuetral corner, ang solido ug tukmang miigo sa nawong sa nauwahi maoy nakapahunong sa away sa 1:18 seconds sa first round.
“Naghuwat lang ko og tayming. Mosud man gyud siya,” matod ni Santisima kinsa mipasaka na karong sa iyang record ngadtosa 14-2.
“Mora man og kahoy nga natumba,” paghulagway ni Edmund Villamor, ang trainer ni Santisima.
Wa usab magmahahy ang kontra “Prince” Albert Pagara nga si Aekkawee Kaewmanee kinsa naila usab sa pangalan nga Patomsith Pathompothong.
Kiwang man tuod nga moaway apan maayo kining mopalagot ug maantigo usab nga motayming sa pagbuhi sa iyang mga kinumo nga maoy makapasungag ni Pagara.
Apan sa fourth round, wa kini makaipsot sa usa ka left upper cut ni Pagara nga mitusak sa ibabawng bahin sa tuong gusok nga nakaligid sa kanbas nga wa na gyud kabangon nga nagping-it sa tumang kasakit.
Gani gi-oxygen kini ibabaw sa ring ug gisakay kini sa stretcher nga gidala sa haduol lnga tambalanan.
Gitapos ni Pagara ang away sulod sa 2:59 segunods sa ikaupat nga round.
Sukwahi kaniadto, si Pagara kinsa aduna nay 28-1, 19 KOs nga baraha, pasensiyado ug wa mag-apura sa maong away nga naghuwat lang sa ensaktong panahon.
Sa supporting bouts, gipakaging sa batan-ong si Joey Canoy ang seasoned-fighter nga si Melvin Jerusalem pinaagi sa unanimous decision.
Si Jerusalem kinsa mipukan ni kanhi world champion Florante Condis sa niaging tuig, napaluhod sa ikapito nga round ug naiphan sa referee. Nakuhaan usab siya og puntos tungod sa low blows.
Gi-knockout usab ni Kevin Jake Cataraja si Lony Cadayda sulod sa 1:47 sa first round samtang gipaundang usab ni Junrel Jimenez si Margarito Moya sa ikaduhang round.
Midaog si Jino Macapobre batok ni Rolien Getalada pinaagi sa majority decision.