PRAKTIS SA LINOG NATINUOD

TALISAY CITY HALL EMPLOYEES NAKURAT; ORMOC NAG-PANIC

Nihimo og earthquake drill ang Talisay City Hall apan natinuod dihang naglinog atol sa ilang pagbansay pasado alas 9:00 kagahapon sa buntag.

Samtang, subling nagkaguliyang sa dakbayan sa Ormoc sa aftershock kagahapon nga 5.8 magnitude sa Richter scale.

Ang City Disaster Risk Reduction and Management Office (CDRRMO), kabumberohan, barangay tanod ug uban pang ahensya sa gobiyerno ang nagtapok sayo sa buntag sa barangay Poblacion alang sa kalihukan sa dihang gihimo ang final briefing.

Matod ni Alvin Santillana, pangulo sa CDRRMO, nga 10 minutos sa dili pa ang pagpagpa-alarm, natingala nalang sila nga ang mga tinun-an sa kindergarten nangpungko na ug nitago ilawom sa bangko.

Pipila ka minutos gipanakanaug ug gitugyan sa mga ginikanan ug didto ilang nasyran nga naglinog na diay.

Kalit lang nasinati ang linog hinungdan nga natinuod ang ilang pagpangandam nga daling nanggawas ang mga kawani sa barangay, mga tinunan sa Talisay City College (TCC) ang naglinya ug nanghupo sa parking area sa simbahan ni Sta. Teresa de Avila. Sa gihimong pakisusi sa city

engineering pinanguluhan ni Gamaliel Vicente sa mga edipisyo nga iya sa siyudad nasuta nga wala ray epekto ang linog.

Bisan niini, gihangop sa mga kadagkuan sa CDRRMO ang situwasyon tungod kay nakit-an gayod nila kon unsa sila ka andam kon mahitabo gayod ang katalaman.

Kagahapon, si Mayor Eduardo Gullas mimando nga half

day ra ang trabaho ug gipapauli ang mga kawani tungod kay mimando ang mayor nga susihon ang City Hall ug Hall of Justice building.

Aftershocks sa Ormoc

Samtang, nagubot sa dakbayan sa Ormoc tungod sa nasinati nga kusog nga aftershock.

Sumala sa Philippine Volcanology and Seismology (Phivolcs), aftershock kini sa magnitude 6.5 nga linog nga miigo niadtong Huwebes.

Dul-an sa 50 ka mga tinunan ang nakuyapan ug naglain ang paminaw human sa aftershock sa New Ormoc City National High School.

Tulo ka tinun-an sa Barangay Gaas ang naangol diin usa ang gikataho nga nalambahan. Ang tulo mao sila si Ian Daniel Sanchez, 11; Janna Rie Payud, 10; ug Jeybie Moremonte, 11.

Lisod agian

Naglisud ang Ormoc City rescue sa agianan apan mipugos pagsaka aron madala sa tambalanan ang tulo.

Misuspenso gilayon si Ormoc City mayor Richard Gomez sa tanan klase aron malikayan nga dunay madisgrasya. Duha ka lalake naman ang milukso gikan sa ikaduhang andana sa usa ka hotel tungod sa karatol. Giila ang duha nga sila si Edgar Tabaco, 46 ug Alexander Balang, 45, pulos taga Quezon City.

Luwas ang duha kinsa gidala sa Ormoc Doctors Hospital.

Mibisita ang mga opisyal sa Phivolcs aron masusi ang kadaot sa linog. /