BABAYE GIBUNDAKAN OG DAKONG BATO

Napalgan ang patayng lawas sa usa ka batan-ong babaye sa kasagbutan sa Santa Lucia Village, Barangay Pulangbato, siyudad sa Sugbo nga ang ulo niini gibundakan og dakong bato.

Kapulisan sa Talamban mosusi kun wa ba lugosa ang biktima.

Sa usa ka hilit nga dapit sa Pulangbato napalgan ang usa ka babaye nga wa nay kinabuhi human kini gibundakan og dakong bato ang ulo niini nga maoy hinungdan sa iyang kamatayon.

Gibana-bana sa kapulisan nga kini nagpangidaron og 15 ngadto sa 17 ug di na mailhan ang nawong niini tungod sa kaguba na nga gituohan nga gibundakan og dakong bato.

Matod ni P/SInsp. Arieza Otida, hepe sa Talamban Police Station, way nakaila sa biktima sa Pulangbato ug ilang gituohan nga taga laing lugar kini nagpuyo ug gidala lang sa mga suspek ug didto gipatay.

“Di pa gyud nato mailhan kay guba man kaayo ang iyang nawong human siya bundaki sa dakong bato,” matod ni Otida.

Wa usab nila wad-a ang posibilidad nga gilugos ang babaye apan kinahanglan pa nilang ipaubos sa autopsy alang na sa pagkuha og mga ebidensya.

Nakakuha og mga botelya sa beer ang kapulisan duol sa lawas sa biktima nga usa sa ilang pagduda nga nag-inom pa ang mga suspek una nila gihimo ang krimen.

Ilang makita sa dapit nga nahawan na ang kasagbutan nga kini nagpasabot dunay nahitabong linayogay.

Duha ngadto sa tulo ka mga tawo ang ilang gidudahan nga naghimo sa linuog nga krimen nga padayon nang giila sa Homicide Section ug Talamban Police Station.

Ang mga residente sa dapit mitug-an sa mga pulis nga dunay mga batan-on nga mag-anhaan sa lugar gikan sa mga silingang barangay aron mag-inom uban sa mga babaye.

Hangtod sa paghikay ning balita, wa pa mailhi ang biktima apan si SPO1 Winston Ybañez sa Homicide Section nitumbok nga way timailhan sa nga gilugos ang biktima kay natarong pa sa pagsul-ob ang tanang sapot sa biktima.

Apan, alang sa pagseguro ilang ipa-autopsy pagtino kon wa ba lugosa kini, matod ni Ybañez.