Gungun, Erwin gisuspenso sa Ombud

Gipatuman na sugod kagahapon ang usa ka tuig nga suspensyon batok ni Dumanjug Mayor Efren Guntrano Gica ug iyang maguwang nga si Konsehal Erwin Gica human sila namatud-an sa Ombudsman Visayas nga sad-an sa kasong simple misconduct ug oppression.

Ang mayor nangunay og kuha sa suspension order batok niya gikan ni Department of Interior and Local Government Cebu provincial director Jerome Gonzales kagahapon sa alas 10:30 sa buntag sa Kapitolyo.

Si Bise Mayor Rainero Asentista ang miasumir pagka acting mayor.

Sa pagkasuspenso, ang mayor gidid-an nga molagda og mga tseke o motudlo og mga tawo sa munisipyo.

Si Efren namahayag nga di pa pinal ang iyang suspension apan siya niangkon nga di makapugong sa kamandoan ang iyang giduso nga motion for reconsideration sa Ombudsman ug ang petition nga gisang-at sa Court of Appeals.

“I am 99 percent sure nga ma- reverse ra gihapon ni,” pamahayag sa mayor.

Iyang gipaneguro nga di maapektuhan ang batakang mga serbisyo sa ilang lungsod ngadto sa katawhan tungod kay nakahan-ay na ang ilang mga programa ug proyekto.

“I don’t think naay angay kabalak-an kay ang vice mayor atua man sang suod unya atua pung kauban sa atoang partido...Unya wa man sad ta did-i sa balaod nga mosud sa munisipyo, mosud sa opisina,” dugang ni Mayor Efren.

Ang magsuong opisyal gireklamo sa usa ka Marlene Alone Quirante, caretaker sa balay ni Nilo Quirante, gidudahang drug personality sa Dumanjug, nga nironda sa panimalay ni Nilo kauban ang kapulisan nga way search warrant niadtong Agusto 9, 2015.

Giingong ang sakyanan sa konsehal ang gigamit paghakot sa mga gamit ni Nilo, kanhi usa ka pulis ug giingong supporter ni kanhi mayor Dumanjug Nelson Garcia nga napildi ni Efren.