Narco-politics sa Cebu

Bisan pa man sa kusganon ug hugot nga kampaniya sa administrasyon karon ni Presidente Rodrigo Duterte batok sa illegal nga drugas, daghan diay gihapon ang nahilambigit niini labi pa sa mga piniling opisyal. Sa pagmatuod niini mao ang pagkasikop sa tulo ka mga konsihal sa lungsod sa San Fernando. Upat gani diay unta ang subject sa warrants of arrest apan ang usa ka wala na sa iyang panimalay sa dihang miadto ang kapulisan. Gi-abandonar na ang iyang pinamalay uban sa iyang pamilya.

Ang nga nadakpan mao sila si Konsihal Edwin Villaver, Alfonso Donaire 1V ug Association of Barangay Council (ABC) president ug ex-officio member Johnny Arriesgado, kinsa nakuhaan lamang ug armas de fuego. Drugas ang nakuha gikan sa panimalay nila ni Villaver ug Donaire. Matod pa ni PRO 7 Regional Director Noli Talino nga ang tulo ka mga konsihal mga galamay ni drug lord Franz Sabalones, kinsa mitahan ngadto ni PNP chief Ronald Dela Rosa niadtong miaging tuig.

Si Sabalones igsoon ni San Fernando Mayor Fralz Sabalones. Kon mga galamay sila ni Sabalones, nagpamatuod ba kini nga nagpadayon gihapon si Sabalones sa iyang negosyo karon? Wala pa mahibaw-i kon na- detained ba si Sabalones karon sa Camp Crame o gawasnon siya. O ba kaha nagka-ugalingon na kining maong mga konsihal sa pagnegosyo ug illegal nga drugas.

Nagtuo ako nga dugay na kining maong mga konsihal nga nahilambigit sa illegal nga drugas. Mga kanhi barangay captain kini sila ug posibleng maoy hinungdan nga nanagan sila sa pagkakonsihal dili aron moserbisyo kon dili aron maprotektahan nila ang ilang illegal nga negosyo. Sa dihang gi- interview sa mga sakop sa media, nanghimakak ang maong mga konsihal sa ilang kalambigitan kay matod pa nila misuporta sila sa kampaniya sa ilang lungsod batok sa illegal nga drugas.

Kampaniya ba uroy. Aw, pila ra man god nang magpaka-aron-ingnon ta. Kampaniya lagi pero sila ra diay nagpasiugda. Dili lang yanong protektor kon dili mga drug lord gyud. Mao kini ang gitawag ug ‘narco-politics’.