Rason sa pag-uswag

Hangtod karon wa pa diay gihapoy klaro kon mahinayon ba o dili ang piniliay sa barangay ug sa Sangguniang Kabataan 2017 elections bisan ning pipila na lang ka buwan nga moabot ang gikatakdang petsa sa pagpahigayon niini. Sa usa ka radio interview didto sa Kaulohan, mismo si Andres Bautista, ang chairman sa Commission on Elections, mitug-an nga hasta sila pabilin nga way kalibutan kon madayon ba kini o gidili sanglit nagpaabot pa sila sa aksyon gikan sa kongreso.

Dili sila makasugod sa preparasyon aron malikayan ang kausik sa kuwarta o pundo nga basin magasto unya dili ra diay mahinayon.

Sa mga kabarangayan, daghan na usab ang naghinamhinam nga nagpaabot kon unsa gyud ang makab-ot nga desisyon sa kongreso ug sa senado.

Gani duna nay nagkagrupo ug nagkasabot nga maghugpong sa pagpapili pagka barangay o SK officials sa ilang tagsatagsa ka mga dapit aron preparado kon mahinayon.

Pero sama sa Comelec dili usab sila makalihok aron mahingpit ang ilang pagpangandam kay wa pa lagi say klaro ang piniliay.

Sa sayo pa, si Presidente Rodrigo Duterte mipadayag na sa iyang pagsupak sa pagpahigayon og election karong tuiga tungod sa rason nga kadaghanan sa mga barangay kapitan o mga officials ang nalambigit sa mga gidiling drugas.

Nahadlok ang presidente nga mopasuabi ug molihok ang kuwarta sa drugas atol sa piniliay ug maoy modominar ang mga narco-politicians.

Gani mao kini rason nga iyang giisbog ang maong piniliay sa niaging tuig.

Daghan ang wa makombinsi sa gisulti sa presidente niadtong higayona, pero kining sunodsunod nga pagkasikop sa pipila ka mga barangay kapitan dinhi sa Sugbo nga nalambigit sa drugas igo na nga makasuporta sa gisulti sa presidente.

Posibling kini maoy i-rason sa senado ug kongreso aron di ihinayon ang piniliay karong tuiga.