Adto modangop sa lokal nga radyo
Kiha. Gipakita ni Cebu city Mayor Tomas Osmeña nga di niya lung-an ang SM ug Ayala hangtod iyang mabawi ang mga lote sa SRP nga napalit sa SM-Ayala sa panahon ni kanhi mayor Mike Rama.
Sa iyang mubong mensahe atol sa ika-3 nga anibersaryo sa radyo dyCM niadtong Sabado, gibutyag ni Mayor Tomas nga iyang ikiha ang SM Properties ug Ayala Land nga nag- consortium sa pagpalit sa dakong lote sa SRP.
Matod pa ni Mayor Tomas nga mogawas nga pangilad ang gibuhat sa SM ug Ayala tungod kay wa sila magkauban sa wa pa ang bidding sa pagbaligya sa mga lote sa SRP apan atol sa bidding nagkuyog na sila.
Ang mga dokumento sa bidding, matod pa ni Mayor Tomas, nga iyang nadiskobrehan maoy mohatag og kamatuoran sa tanan.
Nakahibawo si Mayor Tomas ug nakasabut siya nga ang mga dagko nga mantalaan sa Manila di mosuwat sa estorya mahitungod sa pagpalit sa SM ug Ayala sa lote sa SRP tungod kay dagko sila nga advertiser ani nga mga mantalaan.
Bisan tuod wa siya maghisgot sa lokal nga mga mantalaan apan nakahibawo ta nga advertiser usab ang SM ug Ayala sa tulo ka mantalaan dinhi sa Sugbo.
Mao nga, pung pa ni Mayor Tomas, adto siya moda-ngop sa lokal nga radyo sama sa dyCM nga makasuporta sa iyang kawsa batok sa duha ka dagko nga negosyante nga SM ug Ayala.
Ang primero nga agenda ni Mayor Tomas sa iyang paglingkod human sa miaging piliay mao ang pagbawi sa mga lote nga nabaligya ni kanhi Mayor Rama ngadto sa Filinvest, SM ug Ayala nga alang kang Mayor Tomas barato ra kaayo ang presyo.
Gani, duna say mga estorya nga dunay nakasapi sa pagbaligya sa mga lote sa SRP ngadto sa SM, Ayala ug Filinvest apan kusganon kini nga gipanhimakak ni kanhi mayor Rama.
Ang Filinvest maoy una nga miuli sa lote ngadto sa dakbayan sa rason, matud pa, kay wala makatunol ang dakbayan sa mga papeles sa palit. Apan, ang tinuoray nga rason kay suod ang mga tag-iya sa Filinvest ni Mayor Tomas.
Tungod kay ang gipamung ni Mayor Tomas naatol man sa celebrasyon sa dyCM sa ilang ikatulo nga anibersaryo way usa ka reporter na nangutana sa mayor sa iyang gipamung.
Apan ang akong tupad (nga di lang nako hinganlan) nihunghung og pangutana na ko nganong wa maghisgot ang mayor sa problema sa basura ug trapiko sa dakbayan. Ako siya gitubag agi’g komedya nga di minilyon ang problema sa basura ug trapiko.
Sa lain bahin, nagpasalamat si kanhi Bogo City mayor Junie Martinez sa management ug staff sa dyCM ug sa publiko sa kalamboan sa estasyonan nga nakasulod sa ikawalo nga dapit nga gisunod sa publiko.
Dili tigib nga kuwang sa subo nga sa usa ka dukdok mountol...Bisan pa tuod sa mga hagit, mga challenges, nakahibawo man mo, nia lang ko gihapon tungod kay inyo akong gisaligan, inyoha ming gisaligan. - Carcar City Mayor Nicepura Apura sa iyang State of the National Address.