Bloody Crayons, showing na ugma
Maayo kay apil si Jane Oineza sa horror film nga Bloody Crayons nga showing na diay ugma, July 12 sa mga sinehan.
Maora man gud ni siyag nawa sa sirkulasyon sukad nagbuwag sila sa basketball player nga si Jeron Teng.
Mga tuig 2012, ako ni silang naka- bonding sa iyang mommy Elizabeth atol sa show sa aktres sa Gaisano Bogo courtesy ni Ms. Rose Gaisano.
Si Jane usa sa mga kanhi promising stars sa Kapamilya apan maorag nadaut siya pagapil niya sa Pinoy Big Brother niadtong 2014 kay didto nakit-an ang iyang tinuod nga batasan.
Apan bata pa lang siya ato, 18-anyos lang. Basin gipahinog lang una siya sa ABS-CBN.
Bisan si Jane niangkon nga hasta siya nahibong ngano wala na siyay bag-ong proyekto sa ABS-CBN kundi puros guestings na lang. Nagpaabot kuno siya sa gisaad sa Star Magic nga hatagan siya og break sa showbiz.
Sa Bloody Crayons daghan silang cast ug mas nag-una pa sa poster ang mga pangan nilang Janella Salvador, Elmo Magalona, Sofia Andres ug Diego Loyzaga. Naa sa ikalima ang pangan ni Jane, gisundan nilang Maris Racal, Yves Flores, Empoy Marquez and Ronnie Alonte.
Si Alonte tingali ang bida kay duna may “and” sa iyang billing. Basin siya ang killer? Kay maorag inspired ni sa 1996 horror movie nga “Scream” ni Wes Craven. Sige, manan-aw ta aron ta mahibawo.
ISYU SA MMFF
Upat na kabuok ang nangresign sa executive committee sa Metro Manila Film Festival kay wala na kuno masunod ang ilang reporma nga gusto nilang ipatuman.
Last year bitaw, gihatagan na sila og higayon nga matuman ang giingon nilang reporma. Di ba walay mga pelikula nilang Vice Ganda ug Vic Sotto ang nakasulod kay mas gihatagan og prioridad ang indie films. Unya, nikita ba ang MMFF? Wala!
Unta, kining mga nang- resign maminaw sad sila sa pulso sa masa nga maoy kusog mananaw og sine. Basta December mas daghan man gud ganahan manan-aw og comedy kaysa indie.
Kanang market sa indie films maayo ra man na sila manaway pero dili na sila maoy hinan-aw og sine kay kon hinan-aw pa dili unta maalkansi og sobra tunga sa bilyon ang MMFF sa miaging tuig.
Ang kusog manan-aw og sine kanang mga naa sa masa nga yano, kabus ug mabaw ra og kalipay.
Sakto lang nga ibalik ang Vice Ganda ug Vic Sotto nga mga pelikula sa MMFF kay mao nay kalipay ug bonding moment sa pamilyang Pilipino panahon sa Pasko.