Delivery van
Nakapahimo pa gihapon sa pagkinatawug komedyahay silang Maire, Jovy, Nita ug Minda bisan wala pa sila kahuwasi sa kakutas. Nanaligdig sa ilang mga agatng ang dagkong lusok sa singot bisan nakapahiluna na silag lingkod sa multicab nga gidrayban ni Perlito. Karong adlawa man god maoy pagbalhin sa planta sa All Sweet Manufacturing gikan sa karaan niining lugar sa Mandaue ngadto sa dako nga bilding sa Lapu-Lapu. Ug kay mga empleyado man sila niiining Ednabelle Canteen nga maoy consessioner ning maong planta, natural lang sab nga mosunod sila kon asa dapita mamalhin. Nagsunod kining ila karong gisakyan sa R. Wagas Forwarder, ang inabangan nga close van nga maoy gikargahan sa ilang mga gamit. Didto ra usab mosakay silang Rambo ug Tsoyax, ang ilang mga kaubang mga lalake nga maoy nangalsa sa ilang mga kargamento.
“Ayaw’g luya-luya diha, Marie, kay wa pa ta mahuman sa atong trabaho!” banghagni Minda.
“Di man kabahin sa trabaho ang akong gihinuktokan. kundi ang gasto sa pamilite,” tubag ni Marie. “Layo man god ang Lapu-Lapu.”
“Aysus! Gamay ra nang problemaha, Marie, kaysa atong nasinati sa daan natong Canteen,” salga ni Jovy.
Sigon sa ilang nasinati sa daan nilang Canteen, maghilak gyud ang semana kon dili sila maka- charge. Tungod sa mga iring sungkaban nga mohinok lang pagsulod sa kitchen area matag higayong malipat sila samtang magluto. Ug ang matangag niining sud-an sila ang magbayad. Kadali ra ba gyud kaayong maka- issue og charge slip si Sir George Raul ang ilang manedyer. Sa pagya pa sila’y nagpatambok ning mga sungkaban.
“Magpausa na ‘tong mga iringa karon.” gibuak ni NIta ang daklit nga kahilom.
“Ah! Mayra gani to’g mamatay!” ingon sa nagpaminti si Marie. Siya man god ang kanunay nga mabiktima.
Mihunong ang ilang gisakyang multicab tupad sa gikargahan sa ilang mga gamit. Human sila makakanaog, mihangad sila sa bag-uhay lang nga nahuman nga edipisyo. Karon pa lang nakaseguro na sila nga safe kini tungod kay pulido ang maong estraktura. Gilibot sa ilang panan-aw ang palibot. Way bisan anino sa iring nga natikaw-tikaw. Niini gibati silag kagaan sa buot. Dinhi dili na sila makacharge pa.
Apan pag-abli nila sa pultahan sa delivery van aron ikanaog ang ilang mga gamit, namudlat ang ilang mga mata sa kahingangha. Halos dili sila makatuo sa ilang nakita.
“Rambooo!” sangpit-singgaak ni Marie. “Wa man nimo klarohag tan-aw sa wala pa nimo sirad-i ang van! Tanawa, ay! Nanguyog nato pagbalhin ang mga sungkaban!” (KATAPUSAN)