GUV’S CUP PALAPDAN
Human sa kalampusan sa labing unang pagpahigayon sa Cebu Governor’s Cup Inter-town/ municipalities
basketball tournament, ang mga nagpasiugda mipasalig nga mas padak-an pa ang kompetisyon sa sunod tuig.
Nagkanayon si Cebu Provincial Sports Commission (CPSC) executive director Ramil Abing nga milapas sa ilang pagtuo ang natagamtam nga kalampusan sa torneyo.
Gumikan niini, matod ni Abing nga human sa unang edisyon sa torneyo, gimanduan dayon siya ni Governor Junjun Davide nga maghimo og pagtuon aron mas mapadak-an pa ang torneyo sa sunod tuig. “It’s really beyond our expectation. Grabe ka warm, grabe ang kainit sa support sa mga LGU (Local Government Unit) from the very start,” asoy ni Abing.
“Wala gyud mi nag- expect nga diha-diha dayon, atong makuha ang kinatibuk-ang support sa participating LGUs.” Gawas sa kalampusan, gipasegarbo ni Abing nga naangkon sab nila ang ilang tinguha nga makadiskubre og mga talento sa nagkadaiyang mga lungsod.
Wala pa’y tino kon pila apan matod ni Abing nga sa iyang nasayran, ubay-ubay nga mga magduduwa sa torneyo ang nahatagan og scholarship aron mahimong varsity
players sa nagkadaiyang mga tunghaan.
“As far as I know, dili lang schools diri sa Cebu ang ningkuha og players sa atong tournament,” dugang ni Abing.
Matod ni Abing nga aduna sa’y nakuha nga magduduwa gikan sa torneyo ang Far Eastern University ug San Sebastian College sa Manila.
“Proud kaayo ta ana nga natuman ang atong goal as a developmental league,” asoy ni Abing.
Ang torneyo alang lang sa mga residente sa partisipanting mga siyudad ug lungsod nga nag-edad og 17 hangtod 21 anyos.
Asoy ni Abing nga ning puntoha, nagplano na silang pasakaan ang pinansyal nga suporta ngadto sa matag
teams alang sa sunod tuig. Ang Probinsya sa Sugbo naghatag og P20,000 nga pinansyal nga suporta sa matag team ning tuiga. “Atong padak-an ang subsidy sa matag team for next year. Mao pa na’y definite as
of now. Seguro, tanang LGU’s mangapil na next year,” asoy ni Abing.
Ning tuiga, moabot sa 38 ka mga LGU ang adunay partisipasyon sa torneyo diin ang Minglanilla maoy nahimong labing unang kampiyon sa torneyo ug mibulsa sa naglagiting nga P500,000 nga ganti.
I would like to thank the teams who have made this project possible. There are a lot of good things that happened in this tournament and I hope we will have a bigger participation next year. The province will also promise to give bigger cash assistance to the teams that they can use during the entire course of the tournament. - Cebu Governor Hilario Davide III