PULI-PULI NGA BROWNOUT SA SUGBO MAGPADAYON
Nangayo og pagsabot ang Visayan Electric Company (Veco) sa ilang mga konsumidor tungod niining nagpadayon nga rotational brownout sa Sugbo.
Nagsugod kini human niigo ang 6.5 magnitude nga linog sa lalawigan sa Leyte niadtong Hulyo 6.
Gibutyag ni Veco chief operating officer Anton Mari Perdices nga tungod sa nahitabong pagtay-og sa yuta sa Leyte, naguba ang geothermal plant sa Leyte diin naghatag unta og 557 megawatts (MW) sa Veco.
Dugang ni Perdices nga nibutyag usab ang National Grid Corp. of the Philippines (NGCP) nga naguba ang 350 kilovolts (KV) nga linya sa Visayas Grid paingon sa Luzon hinungdan nga di makasulod ang supply gikan sa Luzon paingon sa Visayas.
Tungod niini, aduna’y 50MW nga supply gikan sa usa ka coal power plant sa Batangas ang dili kasulod sa Cebu.
Matod ni Perdices, di pa makasulti ang NGCP kung kanus-a kini nila maayo.
Apan nipasalig ang Energy Development Corp. (EDC), ang planta sa Leyte, nga sulod sa 10 ka adlaw operational na pagbalik ilang planta. Gawas niini, gipaubos sa
preventive maintenance ang 100MW nga planta sa Kepco sa dakbayan sa Naga diin giingon nga sa Hulyo 20 pa mahuman. Ang department head sa systems operation dept. sa Veco, Juan Miguel Exaltacion, nagkanayon nga ang NGCP maoy nagdala sa supply sa kuryente nila sa pagkakaron.
Usa kini sa hinungdan nga adunay rotational brownout.
Gipasabot ni Exaltacion nga ang pag- brownout subay sa mando sa NGCP kon aduna’y megawatt nga gikinahanglan.
Mao usab kini ang hinungdan nga di scheduled ang power interruption ug kalit-kalit.
Apan gipaniguro sa Veco nga anaa lang sa usa ngadto sa usa ug tunga ka oras ang
brownout matag feeder nila o konsumidor.
Sa kasamtangan, aduna’y 415,000 ka accounts ang giserbisyohan sa Veco o kapin 2.5 milyones ka mga tawo.
Karon nga ting-uwan, anaa sa 450-460MW ang demand sa kuryente sa Veco lang nga konsumidor.
Gibutyag ni Exaltacion nga niabot sa 155MW ang kakuwang sa supply sa kuryente niadtong Lunes diin nahurot na nila og tuyok ang feeders niini pag- shut down ug aduna’y pipila ka parte nga kaduha nagbrownout.
Dugang niini nga sa nakalabay nga tulo ka adlaw, atol sa peak hours sa buntag gikan alas 8:00 sa buntag ngadto sa alas 12:00 sa udto, Ayala area ang kasagaran sa nakasinati og brownout.
Samtang ala 1:00 ngadto sa alas 5:00 sa hapon, ang Colon area, Ermita, Capitol ug Guadalupe usab.
Apan giklaro ni Exaltacion nga ang tanang lugar nga adunay konsumidor sa Veco ang ila gipaubos sa rotational brownout.
Mapasalamaton ang Veco sa mga 30 ngadto sa 40 ka kompanya nga nipatuman sa ilang Interruptible Load Program (ILP) ug nakahatag og 20 MW alang sa ubang konsumidor.