■ SHABU UG KINHASON:
Si Marietta Fernandez-Selerio (tuo), 57, gipresentar sa Philippine Drug Enforcement Agency (PDEA) 7 human makuhai og P4 milyunes nga shabu sa ilang buy bust kagahapon sa alas 7 sa buntag sa Brgy. Gun-ob, dakbayan sa Lapu-Lapu.
Negosyante og kinhason nakuhaan og P4 milyunes nga balor sa shabu dihang nadakpan sa buy bust operation sa Philippine Drug Enforcement Agency (PDEA) 7 kagahapon sa alas 7:30 sa buntag sa Brgy.Gun-ob, dakbayan sa Lapulapu.
Si Marietta Fernandez Selerio, 57, alyas “Bebot”, negosyanteg kinhason sa Carbon, dakbayan sa Sugbo, gihulagway sa PDEA 7 nga level 3 drug pusher nga kinilo ang ma-dispose.
Si Leah Albiar, tigpamaba sa PDEA 7 nga nahinabi sa Superbalita Cebu, nagkanayon nga si Selerio makabaligyag shabu nga 2-3 ka kilo matag simana.
Si Albiar nagkanayon nga tulo ka buwan nga gi-monitor si Selerio sa ilang tropa human usab magwalawala sa ilang lugar kay nilarga sa gawas sa nasud, labina sa Australia, hinungdan nga dugay nadakpan.
Ang mga ahente sa PDEA7 nipalit og usa ka bultong shabu nga mobalor og P150,000 gamit ang boddle money.
Sa pagtunol niini, ilang gipusasan ug nakuhaag laing duha ka putos nga bulto og laing usa ka dakong putos.
Ang tanan motimbang og 950 gramos nga gibanabanang mobalor og P4 milyunes.
Sa nakuhang impormasyon sa PDEA, si Selerio hilom nga nagpadagan sa iyang negosyo.
Gikan sa usa sa mga isla sa Bohol ang mga kinhason apan sa pag-deliver nila agi sa usa ka barangay sa Lapulapu, nagdala na kinig kinilo nga shabu.
Nilanat og tulo ka buwan ang pagmonitor nila kang Selerio, apan maundang-undang kay nga molarga sa gawas sa nasud human maka-transact og drugas.
Ang amo niya mao ang si anhing si Rowen, alias “Yawa”, kinsa napatay sa kapulisan sa isla sa Banacon sa Bohol.
Si Selerio nga nahinabi sa Superbalita Cebu nagkanayon nga hugtanong nanghimakak sa pasangil kay wa siya magbaligya og shabu.
Matod niya nga human sila maabswelto sa kaso sa drugas uban sa iyang bana niadtong 2002 dihang nadakpan sa kapulisan.
Wa na siya magnegosyog drugas hangtod nga namatay ang iyang bana.
Gibutyag nya nga human silang duha sa iyang bana nakagawas, mi focus siya sa ilang negosyo sa kinhason.
Ang iyang gipamaligya mao ang saang, scallop, ug ubang mahalong kinhason nga ilang gibaligya sa Carbon ug sa mahalong mga restaurant sa dakbayan sa Sugbo.
Gawas niini, duna siyay mga apartment nga gipaabangan ug parlor.
Gipadayag niya nga dugay na siyang niundang sa pagpamaligyag shabu kay nasuko na ang iyang mga anak sa pag apil-apil sa illegal nga kalihukan.
Gipasabot niyanga magsige siyag larga sa Australia kay naa magpuyo ang iyang tulo ka mga anak nga pulos nurse.
Niadtong Disyembre sa miaging tuig naabot siya sa Pilipinas unya schedule na pud unta siyang mobalik sa Australia.
“Akong kontak si “Master Liza” naa sa Luzon. Siya may magsigeg tawag nako nga mopadala siya tag 300 gramos lang. Ako kuhaon. Taudtaud na man hinuon to,” dugang ni Selerio. /