3T HABALHABAL MAG-TAXIMOTOR
NAGPAREHISTRO SA UBER, GRAB, ANGKAS; ILUSAD INABAGAN SA CEBU CITY HALL
Kapin sa 3,000 na ka mga habal-habal driver ang napaubos og orientation sa Cebu City Government subay kini sa pagsulod sa motortaxi hailing apps sa Sugbo.
Si Arnel Tancinco, executive assistant ni Cebu City Mayor Tomas Osmeña, kinsa mao ang gitahasan kabahin niini, nibutyag sa Superbalita Cebu nga anaa na sa proseso sa pag-recruit sa bikers ang tagsa-tagsa ka mga kompaniya.
Lakip sa gustong mosulod sa Sugbo kining Angkas, Uber Moto ug Grab Express.
Apan giklaro sa Grab pinaagi ni Fiona Nicolas, government communications manager public affairs department sa Grab Philippines nga dili Grab Bike kundi Grab Express ang ilusad nila sa Sugbo.
Mahulog kini nga usa ka courier nga magdala og package pinaagi ang motor ug dili ang habal-habal nga klase sa transportasyon.
Dugang ni Nicolas nga mosunod sila sa mando sa Land Transportation Franchising and Regulatory Board (LTFRB) diin niluwat kini og cease and desist order batok sa Grab Bike.
Gikatakda ang launching sa Grab Express ug Angkas apan wala mosulti si Tancinco sa petsa tungod kay magdepende kini sa mga service provider.
Gibutyag usab ni Tancinco nga anaa na sa 250 ka biker ang aprobado sa Grab ug 300 alang sa Angkas.
Sa pagkakaron, gihuwat pa nila ang endorsement letter gikan sa syudad aron masiguro sa service provider nga aduna’y igong impormasyon ang anaa sila bag-o sila magsugod sa maong bag-ong pamaagi sa pagpadala og package ug paghabal-habal.
Nakigcoordinate ang syudad sa nagkadaiyang Barangay Mayor’s Office alang sa endorsement sa tagsa-tagsa ka driver tungod kay sila man ang nahibawo sa ilang konstituwente. Libre nga manghatag og cellphone ang Angkas samtang loan usab nga pamaagi ang Grab. /