UNOM NAMATAY SA DENGUE SA TALISAY

Unom na ka mga tawo ang nangamatay sa sakit nga dengue sa dakbayan sa Talisay ug ang labing uwahing biktima niini usa sa otso anyos nga batanga babaye.

Naobserbahan usab nga nisaka ang gidaghanon sa mga tawo ang nataptan sa maong sakit kon itandi sa susamang buwan sa miaging tuig.

Si Dr. Lino Alanzado, Talisay City Health Officer, nibutyag nga gikan sa buwan sa Enero hangtod sa Hulyo nakatala na sila og 219 ka mga tawo ang nasakit sa dengue lakip ang unom nga nangatay.

Matod ni Alanzado nga kini taas itandi sa susamang buwan sa miaging tuiga sa maong buwan diin aduna lay 176 ka kaso sa dengue ug upat ang namatay sa tibuok tuig.

“Karon naa pa gani ta sa tunga-tunga sa tuig, aduna na tay unom nga namatay, so grabe ang pagtaas karong tuiga,” ingon ni Alanzado.

Hinuon, giklaro ni Alanzado nga dili lang ang dakbayan sa Talisay ang nisaka kon dili sa tibuok gyud nga nasud.

Sa tibuok lalawigan sa Sugbo ang Talisay anaa karon sa ikatulo sa pinakadaghag namatay sa maong sakit ug ika-unom sa daghang kaso maong sakit.

Nagkanayon si Alanzado nga naalarma siya niini tungod kay grabe na gani ang paglihok ug paningkamot sa ilang Anti –Dengue Task Force, apan taas gihapon ang kaso sa dengue.

Ang uwahing namatay nga batang babaye gikan sa barangay Cansojong ug namatay kini niadtong Hulyo 6 sa miaging semana sulod sa prebadong tambalanan sa dakbayan sa Sugbo.

Gibutyag ni Alanzado nga usa sa ilang gibasol mao ang kakuwang sa pagtabang sa mga opisyal sa barangay ug katawhan mismo nga manglimpyo.

Usa sa iyang gitumbok nga barangay diin iyang gihulagway nga kuwang sa pagpanglimpyo mao ang barangay Mojon.

Dinhi taas ang natala nga record nga namatay sa dengue.

Gumikan niini si Konsehal Raul Cabanero Presidenti sa Association of Barangay Council. nagplano nga iyang ipatawag ang attention sa mga opisyal sa maong barangay aron patubagon atol unya sa ilang meeting sa ABC.

Matod ni Cabanero nga wala sila magkuwang sa pagpalabang og ordinansa nga nagsilot niadtong dili makamao manglipyo bisan sa ilang barangay .

Sa pagkakaron, si Alanzado midugang nga ila karong gitutokan ang kampanya batok sa maong matang sa sakit.