Emit dili mobiya sa Alayon
Way plano si Konsehal Dorotheo Emit nga mobiya sa ilang partidong Alayon bisan paman og gikuhaan kini sa chairmanship sa committee on urban poor.
Nagduda si Emit nga naglagot kaniya ang iyang mga kaubang konsehal human niya gikuwesyon ang memorandum of agreement (MOA) nga gipirmahan ni Mayor Gullas ug ang paagi sa pagbayad sa usa ka developer sa 20 porsiyento alang sa urban poor nga wala mahisguti ug wa nalakip sa ilang pamaagi sigon sa guidelines sa housing board.
Nagkanayon si Emit nga iya unya kining tukion ug ipadangat sa nahintungdang ahensya sa gobiyerno.
Apan gitataw ni Konsehal Emit nga bisan pa sa gihimo sa iyang mga kaubanang konsehal wala siyay plano sa pagbiya sa ilang grupo.
Matod niya nga hangtod karon padayon siyang nituo og nisalig sa prinsipyo sa ilang partido pinangulohan ni Mayor Eduardo Gullas.
Gani wala siya magmahay sa lakang sa iyang mga kaubanan kinsa iyang gihulagway nga na-insecure lang tungod sa mga lakang og pagtabang sa urban poor sa Talisay.
Nagkanayon si Emit nga iyang ipamatuod nga makahimo gihapon siya sa iyang trabaho bisan walay komitiba.
Iyang gibutyag nga padayon karon ang iyang pag-giya sa bag-ong nahulma nga urban poor federation sa Talisay nga alang niya maoy insakto ug nasubay sa proseso ug dili ang grupo sa Federation of Talisay City Urban Dwellers Ass. (FETCUDA) nga wala mosubay sa insaktong proseso.
Sa nasayran, ang FETCUDA maoy mipasaka og petisyon batok kaniya aron kini matangtangan sa iyang chairmanship sa committee.