CHR misusi kon CPDRC nakadawat sa med certificate
Gisusi sa Commission on Human Rights (CHR) 7 kon nakadawat na ba ang Cebu Provincial Detention and Rehabilitation Center (CPDRC) sa kopya sa medical certificate sa mga piniriso nga giingong gi-torture sa sakop sa Philippine Drug Enforcement Agency (PDEA) 7.
Matod ni Atty. Arvin Odron, director sa CHR 7, nga pinaagi sa medical certificate, masuta kon nakaangkon og bun-og ang mga piniriso sa wa pa sila nibisita sa maong prisohan.
Niadtong nakalabay nga semana dihang nihimo og surprisa nga pagbisita ang CHR 7 sa CPDRC aron susihon ang kamatuoran nga aduna’y gibun-og ang operatiba sa PDEA nga mga piniriso.
Bisan kon gipanghimakak kini ni PDEA 7 Director Yogi Filemon Ruiz, apan matod niini nga posibleng nakaangkon ang mga piniriso og bun-og human kini nagdumili pagpaaresto.
Matod ni Odron nga base sa palisiya sa Bureau of Jail Management and Penology ug United Nations Standard Minimum Policy on the Treatment of Prisoners, ang mga personnel nga nagdumala sa usa ka prisohan gikinahanglan nga mangayo og medical certificate sa arresting party nga giisyu sa pampubliko nga tambalanan aron masuta ang kahimsog sa piniriso.
Makatabang ang maong medical certificate mga maabswelto ang liability sa habig sa nidakop niini.
“Dili unta dawaton sa CPDRC kon wala’y medical investigation, lalo na og daghan og bunog ang inmate,” matod ni Odron.
Bisan paman og gipanghimakak na kini sa PDEA 7 ug resulta lang kini sa pagdumili pagpaaresto sa mga piniriso apan matod ni Odron.
Dugang ni Odron nga bisan kon makatarunganon ang pagpamun-og sa giaresto kay nagdumili pagpadakop, gikinahanglan nga mapamatud-an kini sa ahensiya nga nagdakop.
“It’s the same when you use firearms to neutralize a suspect. While it’s allowed in the human rights standards to use firearms in cases when a person’s life is under threat, it is not a license to kill,” pasabot ni Odron. /