Grab ug Uber

Tan-awa ra ning Grab ug Uber. Tungod sa ilang pasalig mao diay nga daghan nilang mga driver/operator ang gipangsikop ug gipang-imbarguhan og unit sa Land Transportation Office (LTO) ug Land Transportation Franchising and Regulatory Board (LTFRB) kay way ikapresentar nga nagpamatuod nga sila gitugotan pagpamasahero.

Sa niaging adlaw, atol sa hearing, nabunggo nga kining duha ka Transportation Network Company nakalapas diay sa mga lagda ug kasabutan tali kanila ug sa LTFRB.

Mao ni hinungdan nganong gipamulta sila og tag P5 million matag usa ug maayo na lang gani nga wa pasirad-i ang ilang kompaniya tungod sa ilang pag-abuso.

Susama ra nga ilang giilad ang pipila nila ka mga aplikanteng driver/operator kay wala man nila tumana ang saktong proseso aron ma legal ang biyahe niini.

Ambot og unsay ilang gipasalig nga daghan ug dali ra man kaayong maka- operate ang mga applicant sa pagpamasahero bisan og wala kini makakuha og permit gikan sa LTFRB.

Sa terms and conditions sa Certificate of Transportation Network Company (TNC) accreditation ubos sa Memorandum Circular Number 2015-016, kinahanglan nga adunay Certificate of Public Convenience (CPC) franchise o provisional authority (PA) ang mga drivers, butang nga wala sunda sa Uber ug sa Grab.

Mao nga sa higayon nga kon dunay operation ang LTFRB o LTO way ikapakita ang pipila ka mga driver sa Uber ug Grab nga dokumento nga naghatag kanila og permit.

Ug natural mahug nga illegal o kolurom ang ilang gibuhat nga dako kaayo ug multa, unya gawas nga ma-impound ang unit isuspenso pa gyud ang lisensiya.

Hinaot nga kini maoy magsilbing warning niadtong mga Grab ug Uber driver nga way permit gikan sa LTFRB. Mi-expire na raba diay niadtong July 3 ang accreditation sa Grab samtang sa Augusto ang sa Uber. Wa pa mahisguti kon duna bay renewal.