Panalipod sa mga saksi sa krimen
Usa sa labing mahinungdanong program sa gobyerno mao ang pagpanalipod sa mga saksi sa usa ka kaso pinaagi sa pagbutang kanila ubos sa Witness Protection Program (WPP). Ang maong programa gimugna ubos sa Republic Act No. 6981, “The Witness Protection, Security and Benefit Act.”
Ang tumong niini mao ang pag-aghat sa usa ka tawo nga nakasaksi o kaha dunay kasayoran sa paghimo sa usa ka krimen sa pagtestigo atubangan sa hukmanan o sa usa ka quasi-judicial body, usa ka investigating authority, pinaagi sa pagpanalipod kaniya gikan sa panimalos o kaha economic dislocation. Kinsa man ang mahimong ibutang ubos sa WPP?
Kadtong usa ka tawo nga nasayod o dunay kasayoran sa paghimo sa usa ka krimen ug andam nga motestigo bahin niini. Lakip usab niini kadtong testigo sa usa ka congressional investigation, ubos sa rekomendasyon sa komitiba sa Kongreso nga naghimo sa imbestigasyon, kon ang iyang testimoniya gikinahanglan sigun sa pag-uyon sa Senate President o sa Speaker sa House of Representatives.
Lakip usab niini kadtong usa ka testigo nga nisalmot sa paghimo sa usa ka krimen apan gusto nga mahimong usa ka State witness ug kadtong akusado kansang kaso gi- dismiss sa hukmanan aron mahimong usa ma State witness.
Apan ang usa ka aplikante di mahimong ibutang ubos sa WPP kon ang krimen nga gamitan sa iyang testimoniya di usa ka grave felony, kon kini di ma- corroborate sa laing ebidensiya, kon ang sakop sa iyang pamilya wa mahulga nga dagmalan o patyon aron paglikay nga motestigo siya sa maong kaso ug kon siya usa ka tinugyanan sa balaod bisan pa kon motestigo siya batok sa laing mga tinugyanan sa balaod.
Usa na mang mahitabo kon ang usa ka aplikante sa WPP mahimong kwalipikado isip usa ka testigo? Kinahanglan siya nga mopirma sa usa ka memorandum of agreement sa gobyerno.
Unsa man ang mga benepisyo nga iyang madawat ubos sa WPP?
Apil niini ang security protection ug escort services, immunity from criminal prosecution o sa ato pa di na siya makiha bahin sa krimen diin siya usa ka testigo, ibutang siya sa usa ka luwas nga pinuyanan, tabangan sa pagpangita og panginabuhian, hatagan og traveling expenses ug subsistence allowance samtang nagtestigo siya. Libre usab ang medical treatment, hospitalization ug tambal alang sa mga kadaot ug balatian nga nahiaguman samtang siya gihimong usa ka testigo sa kaso,
(
edbarrita@gmail.com)