You keep me waiting
Nakamatikod si Geraldine sa akong kamalipayon. Diha siya sa among sala, nagtan-aw og balita. Gabii na niadtong tungora.
“Ah, nagkanta-kanta man si Ate? Sure gyud ko nga maayo ka nag buot kang Kuya Jeffrey.”
Nagpangidhat ang akong manghod nako. Gingisihan ko siya.
“Sayop kay, Sis. Di si Jeffrey ang rason kon nganong happy ko ron. Si Troy, uy, ang hinungdan.”
Milingkod ko tupad kang Geraldine. Sa taas nga sopa siya naglingkod. Gisiko ko niyag hinay. Mapahiyumon kaayo siya.
“Kinsa gud na si Troy, Te? Ah, new love nimo, di ba? Way sekretohay.”
“Well, di ko mamakak nimo, Din.”
Unya gisugid ko kang Geraldine kon kinsa si Troy. Nahapak ko niyag hinay sa akong bukton. “Sus, duna ka man diay
crush kaniadto sa imong paghayskol, Te? Wa ka man lang motug-an ani nako?”
“Dugay na man gud to, Din. Pero nia na sab siya sa Cebu, ug nahasol gyud ko ani. Duna na man gud koy uyab.”
“Buwagi to si Kuya Jeffrey, uy, Te. Si Kuya Troy na lang. Ipaila-ila unya ko niya, ha.”
“Ay, oo, uy. Di man sab ingon ana kadali nga buwagan ko si Jeffrey, Din. Dugay-dugay na baya ming uyab.”
“May rason ka man sab nga makigbuwag niya, Te. Makalagot man gyud siya. imagine, kanunay ka niyang indyanon sa inyong date? Wa siyay gugma nimo, uy, Te.”
Nahilom ko. May katarongan ang akong manghod. Kon tinuod pa kong love ni Jeffrey, di ko niya pasakitan. Naghunahuna kog maayo. Unya mipakibo na lang ko sa akong mga abaga dayon kong tindog. Misulod ko sa among kuwarto ni Geraldine aron pag-ilis og para sa balay.
Usa ka gabii, namisita si Troy nako. Diha si Geraldine. Sus, ang kanahan nagpa- cute dihang gipaila-ila ko na silang duha si Troy. Midip-ig siya pag-ayo nako ug dunay gihunghong.
“Guwapo siya, Te. Ako na lang siya. Ayaw na lang buwagi si Kuya Jeffrey.”
Nahikatawa ko ug gisiko ko siyag hinay kay mitan-aw si Troy namo ug morag nahibulong. “May problema ba, Lor?” Nakaahat kog pahiyom. “No. Wa man, Troy.” Mikidhat si Geraldine nako. Gisigahan ko siya sa akong mga mata apan nagkatawa ko. Unya nahiabot si Jeffrey.