Shoulder bag

Samtang sila si Armand ug Karen namahaw ning buntag sa Dominggo gihikyad ni Armand ang bag-ong hulad sa SUPERBALITA Nahuman na siyag kaon ug naghigop-higop lang sa kape.

Mingislo ang iyang ilong sa pagkabasa sa headline: GINANG GIHOLD-AP, GIPATAY.

“Kuyawa lagi karong panahuna, hon,” matod ni Armand sa iyang asawa nga nag-inom og tubig. “Tan-awa ra. Duna na say babaye nga gihold-ap ug gipatay. Busa magbantay ka inigpauli, labi na kay gabii imong ‘duty’ sa IT Park isip call center agent.”

“Diin man patya ang maong babaye ug unsay iyang trabaho?” ni Karen.

“Bayinte nuybe anyos ni siya ug negusyante, dealer og mga alahas ug real estate. Iyang office naa sa usa ka bilding sa Gorordo Ave. Iyang ngalan, Estela Tan. Didto siya hold-apa sa dalan samtang naghuwat og taksi sumala sa SOCO.”

“Ay, naglakaw ra diay siya! Ako kay mosakay man og taksi pauli dinhi sa ato!”

“Wa siya maglakaw. Ang drayber sa taksi nga iyang gisakyan maoy naghold-ap ug nagpatay niya ug gitambog siya sa hilan nga dapit sa Gorordo. Way nabati nga buto ang mga tawo sa dalan, kay taas nga baraw ang gigamit pagpatay nga nagtaop pa sa dughan sa biktima. Suma sa pulis nga nag-imbestigar sa kaso, nawala ang shoulder bag sa babaye nga gisudlan sa iyang selpon, mga alahas ug salapi. Way nakasaksi sa krimen ug way nakamatikod sa ngan sa taksi ug plate number niini. Gipangayoan pag impormasyon ang iyang kabanay, lakip na ang iyang bana.”

Usa ka gabii dihang migawas si Karen sa gitrabahoan niya sa IT Park misakay siya sa elebetor padung sa ubos. Nangita siyag taksing kasakyan. Dihay batan-ong lalake nga miduol kaniya.

“Palit kag bag, M’am?” matod sa batan-on. Gitan-aw ni Karen ang itom nga shoulder bag. Misiga ang iyang mga mata pagkabasa sa ‘brand.’ VITTON. Sus, imported! Mahal kaayo ni. Si Jinky, asawa ni Manny Paquiao, ug si Mommy Dionisia duna niini. Sa iyang nahibaw-an labing ubos nga presyo niini kay P300,000.

“Pila man na, Dong?” sukot ni Karen.

“P10,000 lang, Ma’am,” sa batan-on. “Imo na?” “Dili. Iya ni sa drayber anang taksiha…” sa batan-on nga mitudlo sa ‘Queen Bee Taxi’ nga may plate number URDI23.

Nahinumdom siya sa balita nga gibasa ni Armand duha na ka adlaw ang milabay. May nahunahunaan siya.

“Sige, Dong. Ako nang paliton, pero ugma na kay wa man koy igong kuwarta ron!” ni Karen. “Ingna ang drayber nga mag-abot ta ugma dinhi sa sama karon nga oras.”

Milakaw ang batan-on ug nakigsulti sa drayber sa taksi. Unya mibalik kang Karen.

“Okey, M’am. Sugot siya. Hangyo siya kon naa kay usa ka libo diha nga ipatinga.”

Giukban ni Karen ang iyang shoulder bag. Gikuot ang iyang pitaka ug mikuha og usa ka tibuok usa ka libo ka pesos.

PAGKA sunod gabii diha na si Karen sa gawas sa IT Park naghuwat sa drayber sa taksi ug sa batan-ong lalake. Diha na sad ang giandam niyang P10,000. Wa dangtig dugay miabot ang taksi. Miduol siya. Naabli ang pultahan sa driver’s seat. Gitunol niya ang sobre nga gisudlan sa salapi. Gisuta kini sa drayber, dayong tunol sa shoulder bag kang Karen. Gipaandar sa drayber ang taksi. Apan may naniga nga mga headlight sa mga pribadong sakyanan sa luyo sa taksi. Nanganaog ang tulo ka pulis nga wa mag-uniporme. Giduol nila ang drayber sa taksi.

“Case solved!” matod sa usa ka pulis kang Karen.

Pagka ugma samtang namahaw sila gibasa ni Armand ang headline sa SUPERBALITA, “HOLD-APER/KILLER SA GINANG NGA NEGUSYANTE NASIKOP.’

“Ngiga nimo, Hon!” ni Armand ngadtong Karen. “Dako mag pasalamat ang CCPO nimo! Hain man ang salapi?”

“Sa pulis to, uy! Marked money!” ni Karen nga miinom og tubig.