Congrats Mingla, CPSC
Dili matukib ang kalipay nga nasinati sa tibuok puwersa sa Minglanilla Archangels ug ingon man sa mga lunod patay nilang mga dumadapig human masungkit niini ang titulo sa 1st Cebu Governor’s Cup inter-cities/municipalities 21-under basketball tournament niadtong Dominggo sa USC gym.
Gikan pa lang gani sa paghulma sa maong team, daghan ang nagduda sa kapabilidad niini nga makabuhat ba diay sa ingon kay lagi uwahi na kining mikompirmar sa partisipasyon sa lega nga nahimo karong sumsuman sa mga Sugboanong mahiligon sa basketball.
Pero taliwala sa mga hagit ug pagsuway, ang tanang pagsakripisyo ug pag-antos mibunga og matam-is nga kasinatian nga lisod papason sa atong panumdoman –unang kampiyon sa lega nga gihangop sa kinabag-ang Sugboanon.
Congratulations to coach Edito “Itoy” Salacut for a job well done. Ngadto sa pamilyang Jerry Oberes kinsa way duhaduha nga miitsa sa iyang pinansiyal nga suporta uban sa iyang mga anak nga sila si Emil ug Mickey (team manager) nga nakigduyog sa team gikan pa sa sinugdanan hangtod sa katapusan. Ngadto usab nila ni Minglanilla Mayor Lani Pena, vice-mayor Jojo Selma ug ni municipal administrator Cording Mejias ug sa pipila ka mga staff nga miayuda sa team, Congratulations to all!
Duna pa man tuoy gamayng kakuwangan, apan sa kinatibuk-an usa ka dakong kalampusan ang pagpahigayon sa 1st Cebu Governor’s Cup Inter-Cities/Municipalities basketball tournament.
Una pa lang kadto, apan gisugwakan ug maoy gihimong sumsuman sa kadaghanan ang maong lega nga tataw ug klaro kaayo nga mihaum ug miigo sa programa alang sa grassroots level.
Daghan ang nakabenepisyo sa maong kompetisyon kay daghang mga talent ang nadiskobrehan. Pipila ka mga players gikan sa nagkalainlaing kalungsoran ang anaa na karon sa mga eskuwelahan.
Nahimong giya ang maong kompetisyon sa ilang libre nga pagtungha. Kini gumikan sa aktibo nga liderato ni Atty. Ramil Abing, chairman sa Cebu Provincial Sports Commission (CPSC).
Ubos sa imong pamunoan, dili lang kay sa natad sa basketball nahimong aktibo ang CPSC kon dili apil na usab ang ubang sporting events. Kanimo Atty. uban sa imong kinatibuk-ang puwersa sa CPSC nga maoy responsabli sa dakong kalampusan, dawata ang akong kinasingkasing nga pahalipay. Congratulation and more power. ( junmigs0622@ yahoo.com)