PG init nga gidawat sa OKC

Mainitong gidawat si Paul George sa mga sumosunod sa Oklahoma City Thunder sa iyang pag-abot kagahapon sa bag-o niya nga pinuy-anan.

Ang Thunder, nga usa sa labing lig-ong teams sa Western Conference sa National Basketball Association (NBA), pormal nang mianunsyo nga ilaha nang ikauban si George.

Ang pagkahisakop ni George sa Thunder gilaumang makapahupay sa kasakit nga gibati sa mga sumosunod sa

team sa pagbiya ni Kevin Durant sa miaging season.

Apan gipasabot ni George nga wala siya’y nadungog nga bati gikan kang Durant kabahin sa Thunder isip usa ka organisasyon

ug sa mga sumosunod niini. “KD was like, ‘That place will blow you away,’” matod ni George.

Matod ni George nga gihulagway ni Durant ang Thunder nga usa ka “first-class organization.”

Gibutyag sab ni George nga usa si Durant sa mga mingawhag kaniya nga mobalhin sa Thunder.

Sa laing bahin, gisalikway ni George ang pagtuo nga usa ra siya ka tuig nga moduwa sa Thunder gumikan kay ang pangandoy ning duwaan mao ang Los Angeles Lakers gumikan kay lumad siyang taga Los Angeles. “For me, it’s all about winning,” pasabot ni George. “I want to be in a good system, a good team. I want a shot to win it. I’m not a stats guy. I’m playing this game to win and build a legacy of winning. I’ve yet to do that. I’m searching for it.”

Gipasabot ni George nga nagpanikad sab siyang makiguban sa lider sa Thunder nga si Russell Westbrook, kinsa maoy napiling MVP karong tuiga.

“I’m thrilled. All I was asking for was a little help in Indy. Now I’m getting a lot of help in Oklahoma,” pasabot ni George. Nagkanayon si George nga taodtaod na sab siyang misugyot sa management sa Pacers nga hatagan siya og igong kaabag apan wala kini nahitabo hinungdan nga nakadesisyon siuyang mobalhin.