BRT, mahal nga eksperimento

Gisugdan na ang pagpatuman sa Bus Rapid Transit (BRT) system sa dakbayan sa Sugbo. Apan hangtod karon, daghan pa ang nagduda kon mosaler ba kini sa pagsulbad sa kahuot sa trapiko sa syudad.

Gani, nalangan ang pagpatuman sa maong proyekto sa dihang niingon ni kanhi Presidente Noynoy Aquino niadtong 2012 nga ang BRT usa ka mahal nga eksperimento.

Kini tungod kay mao man kini ang labing unang BRT project dinhi sa Pilipinas. Matod pa ni Aquino, “If we experiment, not on billions worth of project.” Apan iya da gihapong giaprobahan ang maong proyekto.

Gimahalan ni Aquino kaniadto samtang ang BRT mobalor lang og P10.6 bilyunes. Samot na tingali karon nga nisaka na ang balor niini ngadto sa P16.9 bilyunes.

Ang nakamahal sa maong proyekto mao ang pagpalit sa road right of way (RROW), sa mga luna sa yuta nga maagian sa maong proyekto. Tungod sa kahagip-ot sa atong kadalanan, kinahanglan pang palapdan kini alang sa BRT.

Kay kon di, mosamot ang kahuot sa trapiko sa syudad sa Sugbo tungod kay ang mawagtang ang mga public

utility jeepneys ra man. Ang mga pribadong sakyanan nagkadaghan ug ang mga tag-iya niini di man manakay sa BRT.

Bisan ang mayoriya sa mga barangay kapitan sa syudad sa Sugbo nagduda kon makasulbad ba ang BRT sa kahuot sa trapiko sa atong dakbayan.

Sumala pa sa gipirmahang manifesto sa 45 sa 80 ka mga barangay kapitan, 15 kanila mga sakop sa Bando Osmeña Pundok Kauswagan, “The BRT will only take away the PUJs (public utility jeepneys) but will not solve the problem of traffic and the growing number of vehicles in Cebu City.”

Naghuot nang daan ang trapiko sa syudad. Unya, duha ka lane ang eksklusibo nga gamiton sa BRT. Bisag unsaon og arithmetic, bisag unsa pa ka bright ang mokuwenta, mosamot gyud kahuot kay nakuhaan man og duha ka lane ang karsada nga daan nang naghuot.

Matod pa sa mga kapitan, “Existing roads in Cebu City will be utilized for the BRT project thereby causing the roads to become smaller as cars and BRT buses will be traveling side by side.”

Apan atong klaruhon nga wa mosupak ang mga kapitan sa maong proyekto kay ang ilang tuyo mao nga repasuhon ang maong proyekto.

Apan gitun-an na man kini sa World Bank nga maoy mogasto niini. Mogasto kaha ang World Bank sa usa ka proyekto nga way hinungdan?