Duha ka dagkong sugo
Ning buntaga nakailis na si Norman nga nagtindog sa balkonahe sa ikaduhang andana sa ilang balay. Motambong siya sa buntagong misa sa simbahan sa Katedral. Naghulat na lamang siya nga makahuman og ilis si Letty, iyang asawa, aron magkuyog sila sa naandan nilang tulumanon, pagtambong sa buntagon nga misa matag adlaw sa simbahan.
Unya, maoy nalantawan ni Norman ang iyang silingang magtiayon, sila si Al ug Minda, nga desente kaayo sa ilang mga sapot. Padulong sab sila sa simbahan aron pagtambong sa misa.Relihiyuso ang magtiayon ug wala sab silay palta sa pagtambong sa misa sa simbahan matag adlaw. Sila ang nailhan nga nagpadagan og negusyong five-six sa merkado publiko sa siyudad., apan siko og kinaiya. Dili daling maduol sa mga silingan kay wa silay pagpakabana sa mga kabos nga silingan nga nagkinahanglan unta sa ilang panabang.
Giliwag ni Norman ang iyang panan-aw. Nalantawan niya si Senio. Haruhay kinig kahimtang kay nanag-iyag apartment ug pension house nga gipaabangan sa siyudad. Anaa kanunay ang presensiya ni Senio sa bisan unsang okasyon sa barangay: sa bunyag, kasal, adlawng natawhan ug namatyan. Andam siyang moabag sa materyal ug pinansiyal nga panginahanglan. Ning buntaga linga kaayo si Senio sa dapit nga nasunogan, nanghatag og pinansiyal nga panabang aron ikapalit og mga materyal alang sa pagtukod sa balay. Matinabangon si Senio sa mga silingan, apan sukad masukad wa gyud si Norman kakita niya nga misulod sa simbahan aron motambong sa inadlawng santos nga misa.
“Higugmaa ang Diyos labaw sa tanan! Ug higugmaa usab ang imong silingan sama sa imong kaugalingon!” hilom nga nalitok ni Norman ang duha ka tiningob nga labing dagko nga sugo sa atong Ginuo alang kanatong tanan. Miyango-yango si Norman. Kinahanglan balanse gayud ang pagtuman nato sa maong mga sugo sa Ginuo. Mao nga sa panahom ni Norman, klarong pakyas sila si Al ug Minda diha sa ilang paghigugma lamang sa Ginuo, apan wala silay gugma sa ilang mga silingan. Ug labi nang pakyas usab si Senio sa iyang gugma lamang sa silingan, apan wa siyay gugma sa Ginuo.
“TANA, Norm! Manimba na ta! Inigka human natog simba, hatagan natog pinutos nga pan ang silingan natong nasunogan aron duna silay ikaesnak. Pakapinan pod natog sopdrinks!” matod ni Letty nga nakailis na sa pormal nga bestida nga miduol kang Norman didto sa balkonahe.
Mipahiyom si Norman samtang nag-agbay kang Letty. Nanganaog sila sa hagdanan paingon sa silong. Ang dako nilang ‘bakery' nga kusog kaayo ang halin matag adlaw makatabang na kaayo sa ilang pagpakabana ni Letty sa ilang mga silingan. Balanse ang pagtuman nilang magtiayon sa pagtuman sa duha ka labing dagko nga sugo sa Ginuo, nga maoy haom ug sakto natong tumanon, isip matuod nga sumosunod ni Kristo. (KATAPUSAN)