GASTO SA BASURA SA SIYUDAD GIPILO OG 3
Unsay hinungdan nga pilon na og dul-an sa upat ka higayon ang gasto sa Cebu City Government sa paghipos sa basura?
Kini gumikan sa pagdaghan sa koleksyon sa basura ug pagbayad sa paghakot inay idiretso sa paglabay sa pribadong landfill sa Consolacion.
Sa administrasyon ni Mayor Tomas Osmeña, kon maaprobahan ang iyang gipangayo nga P151 milyones alang sa paghakot sa basura gikan sa Hulyo hangtod Disyembre ning tuiga gikan sa transfer station paingon sa landfill ug ang P56 milyones gikan sa Hulyo ngadto sa Disyembre nga pag-abang og heavy
equipment, sa kinatibuk-an moabot na sa dul-an P400 milyones ang gasto sa City Hall.
Sa panahon ni kanhi Mayor Michael Rama, ang City Government nigasto og dul-an P160 milyones matag tuig.
Si John Paul Gelasque, assistant department head sa Department of Public Services, nagkanayon nga ang Cebu City nag- average na karon og 600 tonelada nga basura matag adlaw nga daghan kon itandi sa 400 tonelada sa administrasyon ni Rama.
Kaniadto, ang City Government nagbayad og P700 nga tipping fee matag tonelada nga basura sanglit ang mga truck sa Siyudad maoy direktang moyabo paingon sa landfill apan sa sitwasyon karon sa Siyudad, gipakyaw na og P1,333 sa Pasajero Motor Corporation (Pamocor) lakip na ang paghakot sa basura gikan sa transfer station.
Matod niya nga kaniadto, ang Siyudad makalabay og 82 ka dumptrucks paingon sa landfill sa Consolacion ug karon nga nigamit na og transfer station, ang Siyudad makalabay na og 210 ka basurang dumptrucks.
Sa pagkakaron, ang Siyudad nag-average og P24.7 milyones gikan sa Hulyo hangtod Disyembre sa paghakot ug paglabay sa basura.
Wa kini labot sa tag P9 milyones matag buwan nga abang sa heavy equipment kon maaprobahan ang gipangayo ni Osmeña sa supplemental budget.
Si Gelasque nagkanayon nga ang P56 milyones mao ang pagabang og 10 ka garbage compactor truck ug lima ka dumptruck para maoy mokolekta sa basura gikan sa barangay ug hingusgan usab nila ang Basura Mo Sardinas Ko nga maoy mohakot paingon sa transfer station.
Gitug-an ni Gelasque nga sa kapin P207 milyones nga ilang gipangayo, adunay buffer funds aron ilang ibayad sa serbisyo nga waa pa mabayri sa paghakot sa basura.
Ang Siyudad moabang og P850 matag oras sa 15 ka mga truck sulod sa 24 oras diin ang drayber gikan sa kompaniya nga makadaog sa bidding ug ang garbage loader ug krudo abagahon sa Siyudad.
Matod pa ni Gelasque nga niidtong 2016, gikan sa Enero hangtod Mayo, ang DPS nakalabay og 69,000 ka tonelada paingon sa landfill ug nahimong 88,000 tonelada sa samang mga buwan sa 2017.
Ang kadako sa gasto sa siyudad sa Sugbo sa paghipos sa basura gisaway ni Konsehal Raymond Garcia sanglit iyang gihulagway nga limpyo ang Siyudad kaniadto sa panahon ni Rama kon itandi sa kasamtangang administrasyon diin sobra sa gidoble ang gasto.
Si Konsehal Eduardo Rama niingon nga wa siya makasabot sa konsepto ni Osmeña sanglit ang mga barangay gikan sa north district sama sa barangay Pit-os, kinahanglan pa nga mobiyahe og 20 kilometros para paghuwad sa basura sa transfer station.
Dugang niya nga kon adunay 300 tonelada nga basura sa north district barangays lakip sa Talamban, ang Siyudad makadaginot og P75 milyones matag tuig sanglit P700 ra matag tonelada ang tipping fee.