Drug test sa mga kawani sunod tuig

Human sa kinalitkalit nga drug test sa mga sakop City of Talisay Traffic Operation Development Authority (CT-TODA), diin unom ang nigawas nga positibo, plano sa dakbayan sa Talisay nga isunod na usab ang regular nga mga kawani sa city hall.

Mga sakop sa CT-TODA nga nag positibo wa na gi-renew ang ilang kontrata ug kutob na lang sa miaging buwan.

Apan usa ka opisyal sa Talisay City Hall kinsa nihangyo nga di lang magpaila mibutyag nga mas maayo nga adunay drug test sa regular nga mga kawani ug di lang sa mga job order employee.

Kini human nga wa isalikway sa opisyal nga adunay regular nga mga kawani sa city hall ang tiggamitan og drugas.

Gani, gusto niya nga ilakip usab ang mayor bise mayor, mga konsehal, mga kawani sa barangay ug mismo nga kapitan ug konsehal sa barangay.

Si Dr. Lino Alanzado, city health officer, nibutyag nga lakip na sa ilang plano alang sa sunog tuig tungod kay ang ilang budget karong tuiga alang man sa mga job order employee.

Samtang nagmabinantayon usab sila sa maong lakang tungod kay regular kining maong mga kawani ug protektado sa balaod sa Civil Service Commission.