Let’s not forget
Gitan-aw kog dugay si Freddie. Seryuso siya. Apan wa ko seryusoha ang iyang giingon. Mikatawa ko. “Are you kidding, Fred?” Lisod katuhoan nga tinuod ang gisulti sa akong boyfriend. Hapit na gud maduha ka tuig ang among relationship?
“No, Melba. Wa ko magkumedya nimo.”
Midiyong ang akong mga mata. Gitutokan ko pag-ayo si Freddie. Miduko siya. Morag duna siyay lawom kaayong gihunahuna. Every now and
then manghupaw siya. “Ingon ba lang diay ana kasayon nimo ang pagputol sa atong pagminahalay, ha, Freddie?” Gusto na gyud kong mohilak.
Naghingus-hingos na man gani ko.
“Let’s face the reality nga di ta para sa usag usa, Mel.”
“Nganong karon man lang, Freddie? Kataas sa panahon nga imo kong gipalaom. Gisaad mo nako nga di ka motuman sa gusto sa imong
parents. But now, misurender ka? Nada’a gyud ka sa pressure sa imong mga ginikanan.” “I’m sorry, Melba.” Giumod ko ang akong nawong sa duha ko ka palad. Nauyog og kusog ang akong mga abaga sa akong pagbakho. Unya, dihang medyo naluag-luag na ang kahuot sa akong dughan, gipahiran ko sa akong mga tudlo ang akong mga luha sa mga mata. Wa na si Freddie sa akong tupad. Mibiya na siya nako.
Wa man lang siya mananghid nako. Wa na gyud koy bili niya. Kaayo na gyung iambak sa dagat, uy, aron matapos na ang tanan kong kaguol. Apan nalamdagan gihapon ang akong hunahuna nga di ko angay magpakamatay. Sakit man gyud tuod kaayo ning nahitabo sa akong lovelife apan sure ko nga masugakod ko kini.
Sukad sa sinugdanan sa among relasyon ni Freddie daan nang supak ang iyang mga ginikanan. Wa sila makagusto nako, kay anak lang ko sa ilang labandera. Sakit nga mga pulong ang akong nadunggan gikan sa mga ginikanan ni Freddie. Gusto nila nga magpahilayo ko kang Freddie. Ginganlan ko nilag ambisyosa. Way uwaw. Bagag nawong, ug uban pang mga pang-insulto sa akong pagka babaye.
Apan sala ko ba diay nga mahigugma og anak sa datong mga ginikanan? Pugngan ko ba diay ang akong gibati kang Freddie? Almost
two years nga naglaom ko kang Freddie. Apan karon, nawala ang tanan. Pagkasakit gyud! Miilak na sab ko. (SUMPAYAN)