Lovelife

Usa sa maanindot sa biseklita mao ang pagpakigtagbo og bag-ong mga higala. Wa sab ni edaray kay ang 16 anyos mahimong makigbarkada sa 45 anyos o mas taas pa og edad. Usa ra ang denominator, ang mountain biking. Apan ang labing nindot mao ang panagsuod sa mga siklista nga dunay uban, maora na og mga igsuon.

Sa pagkamatay sa akong amahan niadtong 2015, ang akong mga higala sa Tindak Bisdak Folding Bike Society ug G1 ingon man sa mountain biking, nigahin og higayon sa pagduaw sa haya. Ang haya nahimong langas kay basta mag-abot ang mga siklista, ang tanang kabuang mogawas.

Sa grupo, naa man say tawo nga mahimong makalingaw o kataw-anan. Mao nang langas kon magtapok na ang mga siklista. Sa paghaya sa akong amahan mga duha kapin ka tuig na ang nakalabay, wa ko makalimot nga nakahilak ko sa pagkatawa. Usa sa among mga kauban nagtuo nga ako ang gihaya hinungdan sa iyang kakuyaw pagkakita niya nako. Nanghugyaw ang among grupo sa pagkatawa.

Gipapauli

Duna sab mi ride nga naabtan mi og alas 2 sa hapon dihang gitawagan ang among usa ka kauban sa iyang asawa kay hain na lagi siya. Nagpalaban siya namo nga way signal ang amoang naagian nga mga dapit. Ipaestorya niya sa among usa ka kauban ang iyang asawa aron mosulti ini nga tinuod way signal. Nanghugyaw sab mi og katawa bisan kon tinuod ang iyang gisulti.

Lain nakuyog namo mga newbie. Sige sab og panawag ang ilang mga asawa. Two weeks later, ilang mga asawa kuyog na nila sikad sa bukid. Nagpugong mi nga di mokatawa sa among nakit-an kay basin mauwaw sila.

Mao na nga ang ubang mga ulitawo, ila na lang gigalgal daan ang ilang mga uyab sa pagbiseklita aron makahibawo sa kultura sa mga siklista. Kay sa pagkatinuod, sa biseklita, 99.99 percent ini binarkada ra tali sa babaye ug lalake bisan pirmeng magkuyog.

Magselos

Naa koy nailhan nga babaye nga hilig og sikad. Unya ang iyang mga kuyog lalake nga ang uban minyo usab. Nahibung ko nga ni-post siya nga moundang og sikad. Ako siyang gi-private message kon ngano. Iya ra diay tong atik kay ang ubang mga asawa nagselos niya kay kuyog ni sa ilang mga bana.

Ako siyang giingnan nga di siya maka blame sa mga misis kay wa sila kaila niya. Ikaduha, wa sila makahibawo sa kultura.

Mao na nga iyang gi-unfriend ang uban aron di na magselos. Busa kon ikaw nagplanong magbiseklita, iapil sa plano ang asawa o uyab. Kay ang lovelife maapektuhan basta biseklita nay kabuangan.