TUBAG SA PAG-AMPO
Ang mga tawo nag-ampo sa Kahitas-an sa lainlaing rason.
Adunay nagpasalamat sa mga grasya nga nadawat, nangayo og kaayohan sa sakit o pasaylo, namarayeg makapasar sa eksaminasyon, nangayo og
lovelife ug uban pa. Usahay, ang tubag sa pag-ampo dili dihadiha madawat apan sa insaktong panahon.
Si Marianne Audrey ' Yanee' Mahusay Bonjoc, 36, nag-ampo sa Ginuo nga hatagan og lalake nga makadawat kon kinsa siya ug unsa ang iyang mga kaagi sa una.
Sa iyang pag-ampo, duna siyay listahan sa 10 ka mga hiyas nga iyang gipangita sa usa ka lalake nga iyang pakaslan.
Tulo niini-- usa ka Kristiyano nga mahadlukon sa Ginuo, bahala og dili gwapo basta masuroy sa Ayala Mall ug dunay titulo sa pangan sama sa usa ka engineer o lawyer.
Niadtong 2006, ang iyang pag-ampo nadungog dihang nagka-ila sila ni Edvincent Bonjoc, 33, iyang kanhi kauban sa trabaho sa usa ka business process outsourcing sa dakbayan sa Mandaue.
Si Vincent, padung na mobiya sa kompaniya human ni- resign samtang, si Yanne bag-o lang nasulod sa trabaho.
Ang dalaga, nadestino sa Human Resource Department ug maoy naghikay sa mga dokumento aron ma- clear si Vincent.
Nagsugod ang ilang love story dihang nagsige na og text si Vincent kang Yanee ug nag- follow
up sa iyang clearance. Hangtod, kini nangulitawo ug namisita na ni Yanee.
Sila unang nakasal sa huwes niadtong Mayo 8, 2007. Dihang naminyo, si Yanee nakaamgo nga tanang mga hiyas sa lalake nga iyang gipangita naa ni Vincent, gawas lang nga way titulo ang pangan niini.
“Ihatag sa Ginuo imong gusto, except sa mga butang nga siya ra ang nahibawo,” pahayag ni Yanee, bag-ong graduate sa kursong abogasiya sa University of Southern Philippines.
Mas nahigugma ang dalaga kang Vincent gumikan sa pagkabuotan niini, mahigugmaon sa Ginuo ug mas daghang nahibaw-an nga mga butang kon itandi niya.
Human sa 10 ka tuig, sila nagpakasal og balik sa Christian wedding sa Mt. View Nature's Park sa Barangay Busay, siyudad sa Sugbo. Sa wala pa ang Christian wedding, si Vincent nag-ampo sa Ginuo sa petsa sila magpakasal.
Si Yanee niasoy nga 777 ang gipakita nga numero kang Vincent, nga matod niya, maoy numero sa Ginuo, hinungdan nga nahitabo ang ilang Christian wedding niadtong Hulyo 7, 2017. /