‘WA’Y HIKAPAY’
Sa pagtiklop sa ilang media tour, gilab-as pagbalik ni boxing icon Floyd Mayweather Jr. ang iyang bahad nga i- knockout si mixed
martial arts superstar Conor McGregor sa umaabot nilang panagharong. Ang duha ka bantugang fighters magsangka ibabaw sa
boxing ring karong Agusto 26 sa T-Mobile Arena sa Las Vegas, USA.
Sa ikaupat ug katapusang tipik sa ilang media tour, nagpadayon ang insultohay ug linabaya’y og mainit nga mga pulong apan usa ang gipaneguro ni Mayweather – dili siya mohikap kang McGregor hangtod dili pa moabot ang gikatakdang petsa.
Gipamatud-an kini ni Mayweather bisan giunhan siya paghikap ni McGregor nga tatawng dala pasingit.
“I am boxing,” matod ni McGregor nga nakadawat og lanog nga abiba gikan sa iyang mga dumadapig.
Human niini, gihapuhap ni McGregor ang ulo ni Mayweather nga nakapauwaw kang Ultimate Fighting Championship (UFC) president Dana White.
Gikorehian ni White si McGregor sa pagbuhat sa ingon.
Maayo na lang kay wala nagpadala si Mayweather niini ug wala kini mibawos.
“I ain’t gonna touch you until August 26th,” matod ni Mayweather. “I’ll knock you the [expletive]
out, punk.”
Gipasalig ni Mayweather nga iyang tudloan og leksyon sa boksing si McGregor, kinsa moaway sa labing unang higayon isip professional boxer.
Dili ikalimod nga usa si McGregor sa labing maayong MMA fighters sa tibuok kalibutan apan kon boksing ang hisgutan, daghan ang nagtuo nga wala ra siya sa kumigking ni Mayweather.
Si Mayweather, kinsa kanhi boxing pound-for-pound champion, wala’y pilde sulod sa 49 ka mga away. “You’re the student and I’m the teacher,” dugang ni Mayweather. “On August 26, I’m going to take you to school.”
Si McGregor, kinsa nagsaulog sa iyang ika-29 nga adlawng natawhan, wala nagpalupig ug mibawos sab kini pagbahad kang Mayweather.
“In six weeks, I’m going to sleep this fool. And when I sleep him, I’m going to bounce his head off the canvas as well,” matod ni McGregor.
Ang panagharong nila ni Mayweather ug McGregor gilaumang mobuak og daghang mga rekord lakip na sa kapin sa $600 million nga naani sa panagharong nila ni Mayweather ug Filipino boxing icon Manny Pacquiao niadtong 2015.
I ain’t gonna touch you until August 26th. I’ll knock you the [expletive] out, punk. You’re the student and I’m the teacher. On August 26, I’m going to take you to school. – Mayweather