SINGER GIARESTO

GIPASANGINLAN NGA MISUWAY SA PAGPANGLUGOS SA WA PA ANG CONCERT

Usa ka bag-ong sikat nga

singer ang giaresto kagahapon sa tungang gabii human kini giingon nga misuway sa pagpanglugos sa usa ka giingong kaila ra usab nga babaye.

Base sa impormasyon nga nakuha ning mantalaan, kaila ang duha tungod kay pareho sila nga niapil niining usa ka singing

competition sa national TV. Matod sa hepe sa Mabolo Police Station, Sr. Insp. Jacinto Mandal Jr., nga niduol ang biktima sa ilang presinto aron mangayog pakitabang tungod sa alegasyon niini nga gihilabtan siya sa singer. Dugang ni Mandal nga citizen’s arrest ang nahitabo kagahapon sa alas 12:00 sa tungang gabii human mi- perform ang maong singer sa usa ka concert sa sikat nga komedyante niadtong Sabado.

Sa wala pa ang maong concert dihang nireklamo ang babaye sa police station. Tungod sa alegasyon niini, gikuyogan kini og pulis paingon sa venue sa concert diin didto na giaresto ang singer, wala hinuon kini misukol ug yano ra nga mikuyog sa kapulisan.

Dugang ni Mandal nga wala’y special treatment ang gihatag sa singer ug nakatulog pa kini sulod sa prisohan.

Apan ala 1:00 sa hapon kagahapon dihang nireklamo kini nga gasakit ang dughan.

Daling nitawag ang kapulisan sa labing duol nga Emergency Medical Services ug gidala ang

singer sa usa ka tambalanan sa Barangay Banilad.

Didto gi- assess sa doktor ug gi- admit kini. Duha ka pulis ang nagwardiya sa singer samtang anaa kini sa tambalanan.

Nasayran nga kaila ang singer ug ang babaye tungod kay giingon nga nagtextsanay pa kini.

Sa usa ka condo sa Barangay Lahug giingon nga nahitabo ang insidente.

Matod ni Mandal nga karong adlawa pa mahibaw-an kon mopasaka og kaso ang maong babaye batok sa singer.

Gisuwayan ning mantalaan pagkuha sa iyang habig ang babaye apan sa pagkutlo ning balita dili kini motubag sa tawag o text. / HBL