SAN ROQUE, TANGKE NAGSUNGI SA UTLANAN

Mga opisyal sa Barangay San Roque dakbayan sa Talisay gusto na nga masulbad ang ilang kasungian sa utlanan sa ilang barangay tali sa Barangay Tangke.

Samtang konseho sa dakbayan sa Talisay mipasalig nga ila kining resolbahon sa labing dali nga panahon ang dugay na kaayong kasungian sa utlanan sa yuta sa duha ka barangay.

Nasayran nga atol sa regular nga session sa konseho mitambong si Barangay Konsehal Ernesto Reyes Sr. sa Barangay San Roque.

Didto giyagyag ug gipakita sa konsehal ang ilang mga dokumento nga nagmatuod sa gidak-on sa ilang barangay diin adunay dapit sa ilang barangay nga giangkon sa Tangke.

Matod niya nga naalarma sila human sila makadawat og kopya sa mapa gikan sa City Hall nga nagpakita nga migamay na ang ilang yuta.

Kini mas gamay sa ilang orihinal tungod kay ang ilang barangay adunay gidak-on nga 232 ka ektarya apan sapagkakaron nahimo nalang nga 200 ka ektarya.

Si Florida Sollian, secretary sa Barangay San Roque, miingon nga ang tanang mibarug nga structures sa Sitio Kalinaw ug Sitio San Rafael ang tanang dokumento anaa sa ilang barangay.

Nasayran nga nagsugod ang ilang bangi sa utlanan dihang mibarog ang Talisay Fish Port nga gibutangan og Barangay Tangke bisan sakop kini sa ilang barangay.

Gani kamatuoran niini ang tanang dokumento sama sa building permit ug mga clearance sa fishport diha man gikuha sa ilang barangay.

Samtang aduna na usay bag-ong mibarug nga dakong restaurant diha sa ilang lugar daplin sa SRP giangkon na usab sa Barangay Tangke bisan anaa kini sa ilang barangay mikuhag dukomento.

Matod sa mga opisyal nga maayong sulbaron kini sa labing dali nga panahon sa City Hall sanglit kon di mopabor sa ilang barangay ang desisyon sa City Hall andam silang mopaabot niini ngadto sa korte.

Si Konsehal Raul Cabanero, ABC president, kinsa maoy gitahasan sa pagsulbad sa isyu miingon nga dugay na kaayo ang suliran daghan nang administrasyon ang milabay apan wa masulbad.

“Karaan na kaayo ang maong problema unya bag-o ang pasulbaron so mao nang mangita tag mga tawo nga karaan na nga makasulti ana aron mahatagan tag idea,” matod ni Cabanero.

Usa ka opisyal sa Talisay ang mihulagway nga way gana nga mosulbad ang opisyal nga naglingkod sukad kaniadto ug hangtod karon tungod sa pamolitika nga bisan asa pabor ang ilang desisyon di sila gustong mahiubos ang bisan kinsang opisyal sa duha ka barangay nga pulos nila kaalyado. /