5 bata naluwas sa kapulisan sa drug den sa Danao City

Lima ka mga menor deedad ang naluwas sa kapulisan gikan sa mga drug den sa managlahing mga operasyon sa dakbayan sa Danao niadtong Sabado.

Sa operasyon, P1.1 milyones nga gibana-banang balor sa shabu ang nasakmit sa mga pulis ug 53 ka drug personalities ang nadakpan nga niresulta usab sa pagkamatay ni Antonio Lopez Jr. giingong hitman sa gipasanginlang drug lord nga si Alvaro “Barok” Alvaro.

Si Alvaro gitanggong karon sa Cebu Provincial Detention and Rehabilitation Center.

Si P/CInsp. Gerard Ace Pelare, hepe sa Danao Police Station, nibutyag ang mga menor de-edad nagpangidaron og 12 hangtod sa 16 nga hayan gamiton sa mga hamtong sa drug operation.

Ang tulo ka mga minor nakuhaan og tagsa ka putos sa shabu. Sila gidala sa social welfare office sa dakbayan alang sa evaluation ug counseling.

“We suspect they will be exploited by the arrested pushers,” sumala ni Pelare.

Si manlalaban Noemi Truya Abarientos sa Children’s Legal Bureau (CLB) niingon nga angay imbestigahon sa mga awtoridad ang mga ginikanan sa mga menor-de-edad.

Matod niya ang mga ginikanan nga nagpasagad sa ilang mga anak dunay tulubagon ubos sa Republic Act 7160 kun Special Protection of Children Against Abuse, Exploitation, and Discrimination Act.

Si Pelare namulong nga way mga big-time pushers nga nag-operate sa Danao kondili mga street-level pushers.

“Mo- thrive gihapon ang shabu kay naa pay demand,” sumala niini. “Mangita og paagi ang street pushers nga makakuha og supply sa Danao kay naa pay demand.”

Wala usab sila nakabantay sa presensiya sa mga batabata ni Alvaro sa siyudad, gawas ni Lopez.

Si Alvaro nitahan sa National Bureau of Investigation sa lalawigan sa Bohol niadtong Hunyo sa miaging tuig, human sa pagkamatay sa giingong drug lord sa Central Visayas nga si Jeffrey “Jaguar” Diaz sa nahitabong shootout sa dakbayan sa Las Piñas. SCG, KAL sa Sun.Star Cebu