Regular nga mga kawani sa Talisay ipaubos sa drug test

Human sa kinalitkalit nga drug test sa mga sakop City of Talisay Traffic Operation Development Authority (CT-TODA), diin unom ang migawas nga positibo, plano karon sa dakbayan sa Talisay nga isunod na usab ang mga regular nga kawani sa City Hall.

Nasayran nga mga sakop sa CT-TODA nga nagpositibo wa na gi-renew ang ilang kontrata ug kutob nalang niadtong miaging buwan.

Apan usa ka opisyal sa Talisay City Hall kinsa nihangyo nga di lang magpaila mibutyag nga mas maayo nga adunay drug test sa mga regular nga kawani ug di lang sa mga job order employee.

Kini human nga wa isalikway sa opisyal nga adunay mga regular nga kawani sa City Hall ang tiggamitan og drugas.

Gani gusto niya nga ilakip usab ang mayor bise mayor, mga konsehal, mga kawani sa barangay ug mismo mga kapitan ug konsehal sa barangay.

Si Dr. Lino Alanzado, City health officer, nibutyag nga lakip na kini sa ilang plano alang na sa sunog tuig kini tungod kay ang ilang budget karong tuiga alang man sa mga job order employee.

Samtang nagmabinantayon usab sila sa lakang tungod kay regular man kining mga kawani ug protektado kini balaod sa Civil Service Commission.