Nanungkab og asawa gitipi

(Napatik sa Hulyo 11, 2017)

Gitigbas sa makadaghang higayon hangtud nga namatay ang usa ka lalaki kinsa alegasyong misungkab sa misis sa suspek nga ila rang silingan. Ang insidente nahitabo sa Purok 10, Curvada, Barangay Wangan, Calinan District, siyudad sa Davao. Ang biktima nailhang si Charlie, 37, minyo, mag-uuma ug nagpuyo sa dapit samtang ang suspek mao si Carlo, 44, mag-uuma ug silingan ra sab sa biktima. Miguwa sa imbestigasyon sa Calinan Police Station nga buluntaryong mitahan sa kaugalingon ang suspek ngadto sa kapulisan ug gidala pa niini ang sundang nga iyang gigamit sa pagtigbas sa biktima. Nasayran nga dihang naa sud sa ilang balay ang suspek, nakadungog siya nga dunay misiyagit nga babaye sa gawas sa ilang balay. Dihang iya kining gigawas, iyang nakita ang asawa nga si alyas Marie nga gisuwayan og dunggab sa biktima gamit ang kutsilyo. Sa kapungot sa bana, iyang gidagan ang iyang asawa aron luwason ug dihang nakahigayon ang suspek, iyang giayo og tigbas ang biktima hinungdan nga namatay dayon. Gidala sab sa suspek ang kutsilyo sa biktima nga gamiton unta sa pagdunggab sa iyang asawa, diin suma sa suspek gisuwayan sab siya og dunggab sa biktima maong nasamad siya. / Jeepy P. Compio