PWD nanghangyo og P1,000 nga usbaw

Nanghinaot ang focal person sa hugpong sa mga persons with disability (PWD) sa dakbayan sa Mandaue nga si Micheal Allan Pielago nga mapun-an og P1,000 ang ilang madawat nga tabang pinansyal matag tuig.

Matod ni Pielago nga dako og tabang ang usbaw alang sa 3,800 nga miyembrong PWD sa dakbayan.

Sa kasamtangan nagdawat og P2,000 nga tabang pinansyal ang matag miyembro sa PWD sa Mandaue matag tuig.

Sumala ni Pielago nga dakog tabang kanila kon mapun-an ang ilang madawat nga ayuda sa dakbayan sanglit sagad sa mga PWD wa may mga trabaho.

“Dako kaayog katabang kay in the first place kaning atong mga PWDs mga jobless, atong mga PWDs naningkamot ug eskwela, with that financial assistance, gamay na siya but it meant a lot. Dako na siya katabang nga inadlaw-adlaw nga kalihukan,” matod ni Pielago sa dihang nahinabi ning mantalaan didto sa Mandaue Sports Complex kagahapon.

Usa si Pielago sa mga nipasiugda sa 39th National Disability Prevention and Rehabilitation Week sa dakbayan kagahapon sa buntag.

“Hopefully ma- increasan, maayo unta og ma-increasan. We are praying nga dunay increase,” saysay niya.

Sumala ni Pielago nga tanang mga rehistradong PWD sa ilang mga buhatan bisan mga bata makadawat og ayuda apan ang marehistro karong tuiga, sa sunod tuig pa kini makadawat og ayuda tungod kay ang budget, sa milabayng tuig pa man kini gihimo.

“We do not only give financial assistance but including wheelchair, crutches ,assistive devices, individual in crisis situation sa CSWS,” dugang ni Pielago.

Paambit niya nga aktibo gihapon ang mga livelihood programs sama sa tahi ug paghimog sabon sa sector sa nagkadaiyang barangay sa dakbayan.

Gani atol sa programa kagahapon, gihatagan usab og tag usa ka makina alang sa tahi ang Barangay Tabok, Ibabao, Cabancalan ug Pagsabungan.