APRUBADO SA PBA
Giaprubahan sa Philippine Basketball Association (PBA) board ang pagbuhi nila ni June Mar Fajardo, Calvin Abueva, Terrence Romeo ug uban pa nila nga dekalidad nga players aron makaduwa sa Gilas Pilipinas alang sa FIBA Asia Cup karong Agusto 8-20 sa Lebanon.
Kining maong kalambuan usa ka maanindot nga musika sa pandungog ni national coach Chot Reyes gumikan kay mas lawom ug mas daghan na siya og kapilian.
Uban Pa
Gawas sa mga nangahisgutan, ang ubang mga beterano sa PBA nga nahilakip sa 24man lineup nga gisumiter sa Fiba Asia mao sila si Japeth Aguilar, Allein Maliksi, Raymond Almazan, Jayson Castro, Kevin Alas, Baser Amer, Norbert Torres, Troy Rosario ug Gabe Norwood.
Naa sab sa national pool mao ang Gilas cadets nga sila si Carl Bryan Cruz, Kevin Ferrer, Mac Belo, Jio Jalalon, Roger Pogoy, Mac Belo, Mike Tolomia ug Matthew Wright, amateur standouts Kobe Paras, Ray Parks ug Kiefer Ravena, Fil-German Christian Standhardinger ug naturalized player Andray Blatche.
Ang Gilas Pilipinas kinahanglang makasumiter sa pinal nilang 12-man lineup karong Hulyo 25.
Subay niini, gipahibalo ni PBA commissioner Chito Narvasa nga giusab na nila ang ilang eskedyul sa sunod nga
season aron paghatag og agianan alang sa bag-ong format sa home-and-away qualifiers alang sa 2019 World Cup.
Asoy ni Narvasa nga kini ilang gituyo aron dili magsalimoang ang teams nga magpahuwam og mga magduduwa sa Gilas.
“We made a proposal to the PBA board to incorporate again the Fiba schedule into the new season,” batbat ni Narvasa sa interbyu sa Spin.ph. “Now I have to sit down with Chot and the SBP on how we can go about this.”