Amahan nga mipainom og bino sa iyang anak posibli makasuhan

Human nga ni-trend ang usa ka hulagway sa social media diin nagpakita sa usa ka bata nga gipainom sa usa ka lalake sa gituohan nga ilimnong makahubog, naalarma gilayon mga awtoroidad ug gipatawag gilayon ang lalaki ingon man ang nag-upload niini.

Samtang tun-an usab sa Cebu City Department of Social Welfare and Services (DSWS) kon pasakaan ba nila og kaso ang amahan ug ang amigo niini sa kalapasan sa Republic Act 7610 nga nagprotehir sa mga bata sa abuso, diskriminasyon ug uban pa.

Naila ang lalake nga nagkupot sa iyang usa ka tuig nga bata nga si Ralph Quipte, 20, kinsa taga Barangay Ermita dakbayan sa Sugbo ug ang higala niini nga mao’y nag-upload sa Facebook nga si Jason Lasmarias, 19.

Ang duha gipatawag ni Ermita Barangay Captain Felicisimo Rupinta aron mahinabi kini sa Gender and Development.

Matod ni Quipte nga dili makahubog ang sulod sa botelya kon dili usa ra kini ka juice.

Lingaw-lingaw ra usab ang tumong ni Lasmarias sa pag-upload niini sa social media.

Apan si Rupinta nagkanayon nga bisan pa man sa rason sa duha, dili kini makaayo sa bata tungod kay usa kini ka klase sa pang-abuso.

Awhag niini sa mga batan-on nga ginikanan, nga dili magyaga-yaga sa ilang mga anak.

Niadtong Hulyo 11, gi-upload ni Lasmarias ang maong hulagway nga ni-ani og daghang pagsaway.

Ang DSWS sa ilang bahin, mangayo usab og advise sa DWSD 7 alang sa posibleng ipahamtang sa duruha.