Di ko mogukod sa imong mga lakang
Napapas na ang imong mga tunob sa lapyahan human nangisog ug nanglamba ang mga balod sa panahon.. Kadaghan nang mitaob ug mihunas sa panumdoman ko ang imong pagwakli kanako nga gimad-an sa paglaom kay gikumot sa unos sa wa damha mong pagdumili.
Ah, panumpa nga gisamkon sa haguka nga ugat sa mga pulong nga di makabarog sa sukdanan sa kalig-on ug kamatinud-anon. Kadali nimong malimot sa imong pasalig nga naa ka kanunay magbarog sa akong luyo andam motukod kanako kon moharag ug mapukan sa yuta nga gitumban. Apan dihang ako naumod gipasagdan mo ako kay gipalabi mo ang pagbuhig idlot nga mga katawa.
“Pangisog, Paulo, nagpatuga ka pagsunod kanako. Di kita sama.” Biaybiay ang imong kagiki nga daling nahimong mga tigbas sa pagbugal-bugal. Nakasabot ko kanimo Capaducio, tawo ra ka nga way bukog ang dila. May adlaw ra nga matapos ang imong pagkamaot. Higala kita. Wa ko malimot sa akong pagluwas kanimo gikan sa imong pagkatundag ilawom sa sapa sa Kambuhawe sa atong pagpangaligo atol sa atong field trip.
Diha pa kita niadto sa high school diin wa pa mahanaw ang atong kainosente ug ang kabakikaw sa atong panlantaw sa kinabuhi. . Gipasagdan ta sa panahon sa pagpamugsay sa lawod sa paningkamot. Apan bulahan ka kay sa imong pagkatawo may bulawan kang bahawan nga motagingting sa imong dungog ug garbo. Samtang ako nagpuhonan lag kakugi ug panganti sa usa ka masulawng ugma.
Milakang ang panahon. Dugay na kitang nag-iyahag pangita sa atong kapalaran. Dugay na kang nakabintaha nako sa sinugdanan hangtod sa katapusan sa imong kadaugan. Wa ka magdahom nga sa tunga-tunga misangpit ko kanimo. Kay milakdop sa akong alimpatakan ang imong saad.
“Pads, tabangi ko basin na lang di ko mapakyas.” Sa makadiyot mitutok ka kanako. Unya, nagpanlingo ka. Di ka buot mopakitag kaayo bisag pagtuman na lang unta sa imong saad. Mipakibo ka sa imong abaga, daw wa na ka makaila kanako. Buot kong masuko, hagpaton ang tanang matang sa kalagot. Apan kinsa man ako nga mamugos. Mipadayon ang paglakaw sa panahon. Gipadayon ko sad ang pakigbugno sa mga hagit ug pagsulay hangtod nakatunob ko sa imong gitumban karon.
Apan nagkalahi ang sangputanan. Wa nay nakaila nimo kay kuwang ka sa pagsabot ug pagtahod sa isigkaingon. Daw ikaw ra ang nagpuyo sa kalibutan nga naumol na sa pagka mapahitas-on. Daghan tuod ang moluhod kanimo apan pagpaka aron-ingnon lamang. Pads, ang tanan may kausaban. Wa nay motuo ug mopatalinghog kanimo. Kini ang husay sa kamatuoran.
Sa hilom naluoy ko nimo. Naingon kag tawo nga way anino. Di mapalit ang pagtahod ug gugma baya. Uwahi na ang tanan. Buot kang mag-usab apan nalatid mo na ang sangputanan sa imong pagka wa nay bili.
Sa akong kadaugan nga wa damha mobalingis ko; di ko mosunod sa imong mga lakang. Kalibutan sa panagtahuray ug paghinigugmaay ang akong tikaron ug puy-an. Hinuon dugay na tang wa na magkailhanay, Capadocio.
(KATAPUSAN)