MAGTIAYONG 'ASSET' GIPATAY
SAMTANG NATUG SA BARONGBARONG SA TANGKE, TALISAY
Managtiayon nga nangatulog sa ilang payagpayag gipamusil patay sa wa pa mailhing mamumuno kagahapon sa tungang kagabii sa sityo Tunga, Brgy. Tangke, dapit sa dakbayan sa Talisay nga dunay taas nga kaso sa illegal drugs.
Gituohan sa kapulisan nga naalaan ang bana nga asset sa kapulisan.
Mga silingan sa magtiayong John Augustin Abesia, 36, lumad nga taga Pandanon island sa Bohol ug Gerlyn Garcia Abesia, 35, nakadungog og mga buto sa pusil nianang kaadlawon.
Apan way bisan usa nga nanumbaling kay nagbunok ang uwan.
Ang mga kabanay sa magtiayon ug opisyal sa barangay nihulagway kanila nga mga tarong ug wa malambigit sa
illegal nga kalihukan. Si John Augustin usa ka job
order employee sa Siyudad sa
Talisay ug na-assign sa garbage collection.
Matod ni SPO1 Erwin Carbonquillo, desk officer sa Talisay Police Station, nahitabo ang pagpamusil pasado alas 12 sa kaadlawon, apan pasado na alas 5 sa buntag na- report sa ilang buhatan.
Ang iyang ikatulong anak nga babaye, kinsa maoy nipukaw sa duha, maoy unang nakabantay nga patay na ang ilang mga ginikanan.
Nakuha gikan sa crime scene ang pito ka mga kabhang sa bala sa kalibre .45 nga pistola nga gituohang maoy gigamit sa gunman.
Ang magtiayon adunay samad sa nawong, ulo ug lawas .
Ang ikatulong anak sa lima ka mga anak sa managtiayon nga si Jesilyn,15, niingon nga ang ilang mga ginikanan magkatulganan sa baybayon sa seawall sa ilang gamayng barong-barong samtang silang mga managsuon nagbuwag usab og katog sa ilang mga paryente.
Sa dihang iyang giadto ang iyang mama aron unta mangayog bawon kay moeskuwela na siya, mao na lay iyang nakit-an nga nagbuy-od na kini sa bas ubos sa katre nga ilang gihigdaan.
Ang iyang papa nga naa sa katre nagkadugo na ug sa pagpahayang sa iyang mama, nagkadugo na usab.
Si Konsehal Randy Gabas sa Barangay Tangke niingon nga way nakakita sa responsabli sanglit atol sa hitabo, grabe ang kakusog sa uwan ug ilang nadungog mao ang sunodsunod nga buto sa armas.
Iyang gihulagway ang bana nga buotan ug wa malambigit sa bisan unsang illegal sa ilang lugar samtang ang asawa, kon di manuroy og swertres, mamaligya og isda.
Si Carbonquillo niingon nga base sa ilang imbestigasyon gituohang asset sa kapulisan ang bana samtang posebling gilakip sa pagpatay ang asawa tungod kay posebling nakaila sa nagpusil. /