Mandaue andam mopalit sa CICC
Gitataw ni Mandue City Mayor Luigi Quisumbing nga andam na nga paliton sa kagamhanan sa dakbayan gikan sa probinsya sa Sugbo ang Cebu International Convention Center (CICC).
Sa dihang nahinabi sa mga tigbalita, ang mayor niingon nga humana ang panagsabot sa dakbayan ug sa lalawigan kalabot sa pagpalit niini apan nagkinahanglan gihapon ang dakbayan sa pag-awtorisar sa gobernadora sa provincial board.
Matod ni Quisumbing nga mas ubos sa naunang P350 milyones nga presyo ang pagpalit sa CICC.
“We’ll let the governor disclose that but basically it’s less than of what we originally pegged last year which is P350 million,” matod sa mayor.
Dugang sa mayor nga wa niya giapil sa iyang State of the City Address ang CICC tungod kay ang maong tahas nagkinahanglan pa man ug aksyon gikan sa provincial board ug sa gobernador nga modetalye sa kinatibuk-ang palit.
Kahinumdoman nga sa kasabutan sa kapitolyo ug dakbayan sa milabayng tuig, ang Mandaue na unya ang modumala sa CICC kon mabayran niini ang pasiunang bayad.
Si Quisumbing niingon niadto nga abli kini sa possibilidad nga public-private partnership project alang sap ag-ayo sa CICC tungod kay di buot niini nga mobubo ug salapi gikan sa dakbayan alang sa pagayo sa naguba nga edipisyo.
Gani, niadtong Abril ning tuiga, usa ka Chinese company ang nipadayag ug interes nga mo-invest sa usa ka multi-billion peso nga resort entertainment complex CICC.
Nangayo ug pagtugot sa kagamhanan ang Millennium Pan-Asia Hotel and Resort Inc., usa ka subsidiary sa Hongkong Goldenway group, nga maka-operate ug resort ug casino sa dapit.
Ang chief executive officer sa Pan-Asia Hotel and Resort Inc. Jun Xiao nipadala ug suwat ni Mayor Luigi Quisumbing sa aplikasyon sa certificate of consent ug No objection to operate sa resort ug casino niadtong Abril 5.